SPECIÂL – Stop al Crazy Bob

Il «Crazy bob» al è diventat «Crisi bob». Difat, dopo sîs edizions no si fâs plui la competizion des lozis plui stravagantis che si tignive sul Çoncolan tal mês di Març, e che e clamave dongje plui di dîs mil personis. Lis costruzions plui origjinâls – dutis fatis a man – a vevin la forme di sedon, di isule, di tende indiane, e vie indenant.
«Ma no ‘nd è bêçs», al spieghe l’organizadôr, Attilio Quaglia. Al veve domandât ae regjon Friûl-VJ un finanziament parcè che di bessôl nol rive plui a sostignî ducj i coscj. Ma la rispueste no je stade favorevule. «O ai simpri rimetût par fâ lâ indenant la cariole – al precise – ma no pues continuâ cussì. Ancje parcè che «Crazy bob», in chescj agns, al puartave dongje turisim. E lis istituzions a varessin di sostignî chestis robis».
Prime di lassâ stâ dut, Attilio al veve provât a viodi ancje se al rivave a spostâ la manifestazion a Sapade, dulà che il comun i veve imprometût un jutori. Ma dopo si è tirât indaûr ancje chel. «Noaltris si fermìn culì. Ae prossime… se e sarà mai une prossime aventure», al à scrit sul sît
www.crazybob.it
Valentina Pagani