Che al alci sù la man chel che no i à mai capitât di viodi une biele cjase, mangjade de elare, lassade lâ. Ma tal lûc just. E pensâ: «le met a puest e o voi a vivi li». Si reste a cjalâ, instupidîts. Il cjâf al progjete za di cambiâ i barcons, di fâ il caminet e la taverne, di meti a puest il zardin. E magari tal dâur al reste ancje un stric di tiere par cuatri pomodoros, un toc di ort.
Ma si torne ancje di ca. «Sveiti!», ti dîs chê vosute.
E alore si resone e e partìs la solite frase: «Cun dut ce che al costarà ristruturâle, mi conven fâ la cjase gnove». Ma ise vere che sistemâ une cjase al coste tant?
O isal pardabon dome un lûc comun?
«Dipent dai lavôrs che a son di fâ e di trop vecje che e je la cjase» – al spieghe l’espert Giancarlo Pillinini, inzegnîr che al colabore cun diviers architets, tal so studi di Lovarie di Pradaman. Lui al progjete struturis, implants di sigurece e ancje restaurs di architeture. Cun la sô afermazion, però, no nus à dit nuie di gnûf: nô o vin voie di savê di plui.
Giancarlo, ce lavôrs vano fats intune cjase
di ristruturâ?
Di solit si tornin a fâ ducj i implants – eletric, idric, sanitari e termic – e i paviments dal plantiere. Te plui part dai câs, a son di butâ fûr par fâ la ventilazion dal sotpaviment, impuartante par prevignî la umiditât e previodude ancje par arzinâ il probleme dal gas radon, che chi in Friûl al è une vore presint.
Cussì ancje par chês cjasis vecjis decrepitis, cui mûrs mieç colâts?
Ta chês no si pues propit tignî la struture. Si butin jù i mûrs e si tornin a fâ i solârs in ciment armât, o in len, e si comede ancje il cuviert. Cumò a van di mode chei di len: a son plui lizêrs e a dan mancul solecitazion sismiche.
Ma, plui o mancul, trop costial ristruturâ?
Mil, mil e cinccent euros par metri cuadrât. No je une tarife fisse: dipent dai lavôrs di fâ e des modis. E dopo si à di dî che al è un ciert margjin di insigurece tal restaur. Ven a stâi, che si fâs il preventîf cun ducj i lavôrs metûts in cont ma, dispès, in cors di opare a saltin fûr impreviscj. E cussì, par esempli, tocje meti man in cualchi struture che e someave buine. E il presit al va sù.
La int fasie richiestis particolârs?
Sì, tancj a àn voie di vê la piere in viste: se e jere za le tegnin, se no a domandin di metile. O feveli dai ambients esternis. Dentri, invezit, plui di cualchidun che al ricercje il stîl rustic al ten lis trâfs a viste. E se a son caruladis, miôr ancjemò. Si comprin adiriture gnovis ma fatis cul efiet che al sa di vecjo. E je stade int che e à pretindût di metilis ancje intun contest no propit campagnûl, in plen centri a Udin. Modis, ve!
Mi pâr di capî che, dut câs, a la int i plâs mantignî il stîl di une volte.
Cjale, sì e no. Magari ti metin i trâfs vecjos, però dopo a àn voie di vê dutis lis rifiniduris modernis, tecnologjichis. I sieraments cun dople, triple cjamare di isolament, chel cussì, chel culì.
Ma alore, parcè domandino di ristruturâ une cjase?
O parcè che ur plâs il puest dulà che e je o parcè che le àn ereditade. Di solit al sucêt cussì. E à il zardin biel grant, e je intune zone trancuile, e plâs la forme dal esterni o pûr si à voie di lâ a stâ tal centri di un paîs, di une citadine. E si sa che cui gnûfs plans regoladôrs si pues fâ sù gnûf dome in perifarie. Duncje a decidin di ristruturâ.
Sono zonis dal Friûl dulà che si ristruture di plui?
No, no je une zone in particolâr. Dal sigûr a son plui ricercjâts i puescj in culine, i paisaçs plui biei dal nestri teritori.
Su la fonde de sô esperience, trope int di chê che e cîr cjase vuelie alc di vecjo e trope, invezit, vaie sul gnûf?
E je une domande dificile, ma o podarès azardâ un 50 e 50, in percentuâl.
O vin voie di capî se o vin di spietâ di vinci il Superenalot par ristruturâ la cjase dai nestris siums. In conclusion, l’espert ce disial?
Se la cjase che us fâs suspirâ e je vecje ma tignude ben, butaitsi. Metile a puest al costarà tant che fânt une gnove. Se dopo no vês masse pretesis, o rivarês ancje a sparagnâ. Se invezit e je propit decrepite… bisugne fâsi sù lis maniis e tacâ a lavorâ. L’impuartant al è domandâ simpri un parê a un architet, un che si intint di chês robis ca. Us disarà subit se e je une utopie o invezit un sium che al pues saltâ fûr dal scansel.
Valentina Pagani
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +