«Pordenon calling»? «Anarchy in Friûl»? Trente agns dopo, il punk talian a à ancjemò lidrîs dutis furlanis. Tal 1979 e vignive fûr la innomenade Compilation dal cjampanîl, il prin 33 zîrs dal punk talian, dut made in Pordenon, sunât dai grups punk leâts al progjet (dut spontanei) dal The Great Complotto. Un disc fat in numar contignût, un centenâr di copiis, che no si cjate nancje plui.
Vuê, an 2009, la Shake edizioni lu à ristampât su cd. Al baste dome metilu dentri tal letôr par scomençâ il viaç…
Dopli taramot_ Mai dal 1976: un taramot trement al bute jù mieç Friûl. Zenâr dal 1977: la Ingletiere e je sconvolte di un altri taramot, dome musicâl cheste volte. E cualchidun al scomence a clamâ punk chê musiche svelte, plene di energjie, cussì diferente dal barochisim dal progressive rock. Fevrâr dal 1978: par judâ la ricostruzion dai pais teremotâts dal Friûl, si podeve fâ il propri servizi civîl tant che vigjii dal fûc. In caserme si cjatin cussì Ado, Gibson, Mario Brunetta e miss xoX, zovins di Pordenon che a scoltin chê musiche cussì direte, sunade di The Clash, Sex Pistols e dai americans Ramones. Un moment, e la faliscje e je impiade.
Nimis caput mundi_ Il studi di regjistrazion Avf di Nimis, specializât in corâls alpinis e musiche folk, al è il lûc sielzût pe realizazion dal prin EP (extended play) dal punk talian (il 33 zîrs dal Cjampanîl, invezit, al sarà fat a Bologne). Di une bande dôs cjançons dai Tampax di Ado, di chê altre trê dai HitlerSS di xoX. I zovins, tra i puartis dal cors di Pordenon, a àn imparât a sunâ di bessôi, inventantsi nons e sorenons improbabii, che a duravin spes dome il timp di une dì. A àn dome 20 agns, ma lis ideis ben claris, tai scantinâts dal vecjo Pordenon, che par lôr al è l’imagjinari Stât di Naon. Pure filosofie punk, cuinçade cun grafiche, piture, comunicazion urbane, fanzines, poesie, amicizie e tante, tante musiche.
London is burning_ La citât dal punk ju clame a gran vôs. Il 17 di Mai dal 1979, a Portobello Road, Tampax e HitlerSS a tignivin il lôr prin e ultin conciert te tiere de regjine Elisabete. Un conciert di 1 minût e 30 seconts, dut sunât cun struments…di carton. Chei vêrs a son stâts secuestrâts ae dogane, ma ai zovins di Pordenon no ur è colade la anime e si son tornâts a fâ bessôi dute la strumentazion cun cartons cjatâts a Londre. Il live di chê performance, e je la trace numar 10 de compilation dal Cjampanîl, vignude fûr pôc dopo pe Italian Records di Bologne. In cuviertine, la foto in blanc e neri dal cjampanîl pordenonês de glesie di Sant Zorç. Par un pâr di agns, Pordenon al fo la capitâl dal punk talian, contraponude al Milan de new wave, e lis bands di Naon a forin ancje riprendudis des televisions nazionâls.
Rockstars cun filosofie_ Trente agns dopo, presentant la ristampe e un libri dedicât ae lôr esperience, i protagoniscj a àn dite che il punk ju à salvâts. Cun mancul cjavei tal cjâf, o cun tancj cjavei blancs, cu la stesse energjie de fin dai agns ’70, a àn ancje ricuardât che se a son masse vecjos par fâ lis rockstars, a son une vore zovins par jessi filosofis.
Davide Francescutti
____________________________________________
Musiche cence timp
A somein sunadis chê altre dì, e no trente agns indaûr, lis cjançons de compilation dal cjampanîl. Si va des sperimentazion eletronics di «Paraguay» dai Mess (trace 1) fin ai ritmis rockabilly dai Sex Angels cun «LA beat». Ma ancje spazi par peraulis d’impegn, par esempli cun «Atoms for Energy» dai Musique Mecanique, e i 9 seconts di silenzi di «Individual therapy» dai Mind invaders, e la visionarie «I’m in love with my computer» (pensait, 1979!) dai Andy Warhol Banana Technicolor. Par scuvierzi dut, lait sul sît The Great Complotto,
www.thegreatcomplotto.it
Punk par furlan: Inzirli
Ma il punk al è stât ben vîf ancje di chê altre bande dal Tiliment. I Inzirli a son stâts un grup musicâl furlan punk/hardcore, cun influencis che a rivin fin ae musiche new wave, come che si lei su Wichipedie. Atîfs dal 1990 al 1996, a àn fat un grum di concierts ator pe Italie e ancje fûr. I lôr tescj a jerin par furlan e par talian. Te mini biografie dal grup, “Inzirli, una storia per caso” (Snait, 2001), scrite dal front man Max Mauro, si conte cemût che la lôr musiche e fos rivade fin suntune radio nord americane. I components dal grup a jerin Oscar, Max, Marco, Gb. Par scuvierzi la lôr musiche, lait su http://www.airmp3.net/download/-amor_traicionero/mp3/dlXa_fb8f4_8
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +