Lagune di Maran, la tutele e passe pe cumunitât

“Nô o sin i Maranês, proprietaris de Lagune dal timp de Serenissime; pecjât che chest dirit nol è ricognossût de Regjon Friûl-Vignesie Julie”. Cussì al conte il spazi de Comunitât di Maran, cognossude ancje come Maran Comune, associazion spontanie di 300 socis nassude pe tutele de Lagune. Chest particolâr grup di personis, formât di natîfs o residents a Maran, al pense che no si pues separâ Maran de sô Lagune e propri par cheste reson nissun al pues metisi tal mieç tra lôr e cheste risorse. Maran comune e à inmaneât l’incuintri tra le Comunitât e il Coordinament provinciâl tignît cualchi dì fâ. Pont dal incuintri, la volontât de Comune, di ricostruî il patrimoni civic de lagune, 8mil 700 etars. Ma mantegni al stât naturâl un dai pôcs puescj in Europe cun chestis carateristichis nol è facil come nus che nus contin i socis che cun «amôr e rispiet le an difindude, cul sanc e il sudôr, di progjets di bonifiche». Cence dubi la comunitât di Maran al è rivade, tai agns, a mantegni une elevatissime cualitât di riferiment soci-culturâl grazie a un fuart sens di apartignince al lôr lûc di origjin. Cheste e je nome une des ativitâts de Maran Comune e par vignî dongje ae sô esigjence, il president provinciâl dal Coordinament de Provincie Coletive, Renzo Trentin e il responsabil de Progjet di assistence gestionâl, Delio Strazzaboschi (www.terrecollettivefvg.it), si son cjatâts a Maran cul diretîf de Comunitât Lagunâr (www.comunitadimarano.it). Il prin pont di discussion al à rivuardât la dificoltât de Comune familiâr maraness di jessi ricognossude. Nassude come sogjet di dirit privât cence finìs di vuadagn tra i erêts dai vecjos titolârs de lagune maranese, la Comune al à lidrîs storiche une vore antighis che a rimandin a la prime metât dal 1400. Ricognossude dal Patriarcjât di Aquilee, da la Republiche di Vignesie, dal Imperi austri-ungaric e dal Ream di Italie, cumò e cjate cualchi dificoltât a nivel di ents locâi. Secont il president provinciâl Renzo Trentin «Nissun progjet economic o turistic al pues ve sucès cence il coinvolziment de comunitât locâl maranese e cence il rispiet dai siei ûs e custums secolârs, che a son leâts a une pescje di simpri rispietose dal patrimoni Lagunâr». Al podarès jessi il principi di une vere e proprie bataie che e viôt in prime linie ancje Delio Strazzaboschi: «Il Coordenament regjonâl de Proprietât Coletive in Friûl, al rapresente aromai plui di 90 sogjets (Aministrazions separadis di dirit public e Comunions familiârs di dirit privât), par un patrimoni complessîf di cuasi 40mil etars di tiere, edificis, malghis, albiercs e ripâr alpins». A son simpri plui chei che a domandin spiegazions su cemût dâ une man par ricostruî i patrimoni civic, robis che a son a la fonde de vite dal om: aghe, tiere, forestis e pescje, ma ancje il savê. Di ca l’apel al governadôr regjonâl Renzo Tondo parcè che al tegni in considerazion la bataie de Comunion familiâr di Maran, che no vûl nome ripristinâ un dirit storic, ma e ponte al ricognossiment dal valôr simbolic: il pes dal mâr e il legnam dal bosc, a son risorsis di tornâ indaûr a la comunitât locâl stant che a son sempliç mieç di assistence e che no àn nuie a ce fâ cu la logjiche di marcjât.