SPECIÂL – La cjase furlane: dal fogolâr ae postazion pal computer

Un grues cambiament tal stîl abitatîf dai furlans al è vignût dal sigûr cu la ricostruzion tacade tai prins agns Otante. Lis cjasis a àn cambiât totalmentri filusumie: ancje se il numar dai components dai nuclis familiârs al è lât calant, lis cjasis si son distès slargjadis, rivant a une medie di sîs stanziis par abitazion e dôs par abitant, cuntun indiç di «comoditât abitative» dopli a pet di chel nazionâl. Plui di 8 abitazions ricostruidis su 10 a son vilutis unifamiliârs: cjasis par lôr cont, ben curadis e fatis sù cun criteris di «ipersigurece» antisismiche. E je lade scancelade la cort promiscue tipiche dai borcs furlans; al reste simpri un tocut di tiere che al caraterize lis cjasis: par solit però no si trate di un ort ma di un zardin.
DASPÒ DE RICOSTRUZION_ Cu la ricostruzion, si son viodudis dôs tindincis contrastantis: di une bande, il tentatîf di recuperâ (ancje in maniere artificiose) lis tradizions, di chê altre chel di scancelâ il ricuart di une vite semplice, e dispès ancje grame, che e veve caraterizât i decenis precedents. Tes gnovis cjasis si cjatin cusinins, salotuts, tinei, anticjamaris, verandis, mansardis, rimessis, tavernis, cence plui però chê sensibilitât che e rindeve la architeture rurâl tant significative. Cun di plui lis cjasis a son spes tecnologjichis. Il disvilup e la afermazion de domotiche – sience che si ocupe des tecnologjiis che a miorin la cualitât de vite in cjase – al è influençât di chei cambiaments de societât che ancje la nestre regjon e sperimente: un aument di fameis monoparentâls, di singui, l’alçâsi de vite medie e duncje l’invecjâ de popolazion che e pant gnovis dibisugnis, il fat di stâ simpri plui fûr di cjase, ma ancje un increment (o la sensazion di un increment) de criminalitât, e duncje de necessitât di protezisi des menacis esternis.
GNOVIS CENTRALITÂTS_ Se il spazi abitatîf plui impuartant par tancj agns e je stade la cusine cul so fogolâr, si è passâts ae centralitât dal tinel, custode de fin dai agns ’60, prins ’70, dal ben plui impuartant, la television. Infin, a vuê, la centralitât tes abitazions e je spes rapresentade di elements e di ambients a ûs cuasi dome «individuâl», tant che la postazion dal computer, o la console dai zûcs. Duncje, cul ridusisi dal nucli familiâr si fasin plui piçui ancje i spazis de condivision e de socializazion. Sfantantsi il mont contadin, a jerin za «saltâts» i lûcs sociâi de stale, dal curtîl e de cort, ma tai ultins agns i vêrs cambiaments a son par dentri de cjase. Il strenzisi de cusine al à permetût di vierzi une altre stanzie (il salot «bon»), regonade in maniere cuasi maniacâl e destinade dispès dome ai ospits. Un  ambient che al fâs part de cjase ma che no si lu dopre. Come dî, un «status symbol». Ce che nus ten peâts inmò a une vision de vite rurâl al è salacor propit chest sdoplament de abitazion intune part destinade ae rapresentance, doprade di râr, e une pal ûs cuotidian. Chest al vâl ancje pe cusine buine, pal bagn gnûf, e v.i. O cirìn di integrâ modei abitatîfs e stîi di vite modernis e borghês cun chei inmò contadins e operaris. Come che al rimarche il sociolic Raimont di Strassolt, «lis scarpis impantanadis, lis tutis ontis, i odôrs fuarts dai mangjâs saurîts, a son incompatibii cu lis rafinatecis de cjase moderne, e duncje la vite cuotidiane e je stratignude tal scantinât».
In sumis, ni bêçs, ni comoditâts ni domotiche, no son inmò in stât di scancelâ la nestre olme contadine.
Linda Picco