Sfuei Mensîl Furlan Indipendent
Archivi de Patrie

SPECIÂL – La Caritas in Friûl e je nassude dopo dal taramot dal ’76

............

Cuant che si vûl fevelâ di volontariât tal sens vêr de peraule inte suaze dal mont catolic no si pues no pensâ ae Caritas, che cul so non latin e pant dut il parcè dal so jessi: dal so obietîf primarûl di «fâ caritât» a cui che nol à mieçs par lâ indevant, in dì di vuê la ativitât si è cetant slargjade, simpri a pro de int che e à dibisugne.
Par savênt di plui o vin fevelât cul diretôr de Caritas diocesane di Udin, pre Vigji Glovaz.
Pre Vigji, ce ise la Caritas?
Come che al dîs il prin articul dal nestri Statût, nô o vin prin di dut chê di promovi la testemoneance de caritât te comunitât eclesiâl; in pratiche o sin l’imprest uficiâl de diocesi pe promozion e pal coordenament des iniziativis di caritât e di assistence. Di un pont di viste organizatîf, o sin l’organisim pastorâl de Conference episcopâl taliane, la Cei. La Caritas e je nassude tal 1971 par volê di pape Pauli VI te suaze dal rignuviment inviât dal Concei vatican II: al jere impuartant meti in pîts une struture che e rivàs adore a judâ cui che al veve bisugne, midiant un stret leam cu lis passe dusinte diocesis talianis ativis sul teritori.
Cuant ise nassude invezit in Friûl?
In ocasion dal taramot dal 1976. In chê ocasion al coventà un sisteme svelt e sigûr par coordenâ i jutoris che a rivarin di dut il mont e par po distribuîju a cui che a ‘nd veve pardabon necessitât. Si pues dî che la Caritas cemût che le cognossìn cumò e à metût lis sôs fondis propit in ocasion dal taramot ca di noaltris: chê volte i centris Caritas di dute Italie a faserin zimulaments cun ognidun dai comuns furlans taramotâts par spartî miôr i jutoris.
Cui sono stâts i responsabii de sezion di Udin fintremai al dì di vuê?
Il prin responsabil dal Centri pai taramotâts al fo pre Emilio De Roja. Po dopo, tal ‘78 e fo metude in pîts la Caritas diocesane tant che centri di pastorâl: diretôr al fo nomenât bonsignôr Luigi Murador, che al restà fin al 1984, cuant che al cjapà il so puest Angelo Zanello. Dal 1998 al 2000 e fo diretore une muinie, Nevina Martinis, e po o soi stât sielzût jo.
Cuâl isal il messaç plui impuartant che e da la Caritas in dì di vuê?
Viodi dai puars, ancje di chei dongje di nô: o vin chê di jessi il spieli di une comunitât intiere che e viôt di chei mancul fortunâts. La nestre struture, plui che fâ, e fâs fâ: vâl a dî, che e fâs in mût di sburtâ lis associazions di volontariât e la societât civîl in gjenerâl par che a abadin aes gnovis puaretâts di chenti. La Caritas e à di jessi un pont di osservazion primari par indreçâ cui che al à dibisugne a lâ li che al pues cjatâ un stâ sigûr, ce mangjâ e cun ce vistîsi: no vin di deventâ une sorte di parochie, ancje par no gjavâ int e risorsis a cui che al è a contat cui bisugnôs.
Trope int lavorie te sezion di Udin?
O vin une cuindisine di lôr che si ocupin de gjestion de struture; jenfri chescj, undis a son i operadôrs che a son in ancjetancj centris di scolte sparniçâts te arcidiocesi. In plui o vin uns vincj professioniscj, come bancjaris e insegnants, che nus dan une man a gratis.
Ancje par vie dal taramot che al à fat cetancj muarts e dams in Abruç, cumò come cumò si fevele un grum di volontariât: cemût isal di intindi chest concet secont la Caritas?
Tal sens plui alt, sclet e pûr. Un volontari al è cui che si dâ da fâ a pro di chei altris, cence domandâ ni spietâsi nuie in cambi. Par gno cont si dopre masse dispès il tiermin «volontari» ancje fevelant di cui che al va a judâ par une sô sielte e po al ven paiât; duncje un al è volontari par vie che nissun lu à obleât a fâ une robe e no par vie che al fâs dut a gratis. Pe Caritas la gratuitât e à di stâ tal cûr dal volontariât!
Un grant jutori al è rivât midiant la racuelte di bêçs fate traviers il telefon e i boletins di paiament.
Dut al va ben, ma il probleme al è che i mieçs di comunicazion a riscjin di puartâ indevant un messaç sbaliât su cemût judâ chei plui disfortunâts di nô. Mandant bêçs di lontan, la int e crôt di vê fat ad in plen il so dovê, stant in pâs cu la propie cussience; ma noaltris come cristians o vin di tirâsi sù lis maniis e judâ chei altris cui fats, no cui biliets di bancje. Miôr simpri pontâ sui valôrs, se no si varà dome une sorte di solidarietât deresponsabilizade.
In rapuart ae popolazion, i Furlans a son tai prins puescj cuant che si fevele di volontaris de Protezion civîl o ancje di donadôrs di sanc e di orghins: secont lui, judâ chei altris isal tal Dna de nestre int?
E je une cjosse peade ae culture dal nestri popul, no si improvise di bot in ocasion di un taramot o di altris tragjediis. Ma savêso che lis formis di unions sociâls plui antighis di Europe a son nassudis in Friûl e in Ingletiere te Ete di Mieç? O feveli in particolâr des viciniis, li che e jere cjapade dentri dute une comunitât e ognidun al veve il so compit. Par chest e nasseve une solidarietât spontanie, ducj si judavisi par vie che si cjatavisi in comunitâts di dimensions umanis li che al jere fuart il sens identitari di apartignince. Dut câs, magari cussì no lis robis a stan cambiant ae svelte in piês, cence che nancje si visedin.
Secont lui, in dì di vuê la int cemût viodie la Caritas?
Pe mê esperience, la int e pense che la Caritas e coincidi cu lis robis concretis. No sin dome chei che a tirin sù vistîts e scarpis par dâju ai puars: cun di fat, i stes aministradôrs locâi a cjapin contat cun nô cuant che si trate di cjapâ decisions pratichis su la int che e à plui bisugne. Chest al è sucedût par esempli trê agns indaûr cuant che la Regjon e à prontât i cussì clamâts «Plans di zone» dai Servizis sociâi pal periodi 2006-2008.
Cuâi sono i progjets plui impuartants che o stais puartant indevant?
O vin screât di pôc un centri di acet a Puart Noiâr pai marinârs di dut il mont che a passin lenti; si ocupìn ancje di formazion educant i gnûfs volontaris e o cirìn di stâ plui dongje pussibil ai nestris zovins. In vie Praclûs a Udin, o vin uns vincj jets par cui che nol à une cjase: la struture si clame «Fogolâr». Di agnorums o cjolìn sù vistîts, scarpis ma ancje fier par tirâ sù bêçs par progjets di meti in pîts te nestre diocesi. Vie pal mont invezit o stin daûr a progjets in Romanie, Cravuazie, Serbie e Sudan. Cumò o vin a cûr in particolâr la int dal Abruç, si capìs.
Di dulà us rivino i finanziaments?
Prin di dut des donazions spontaniis de int: o presentìn progjets concrets, ancje di atuâ sul nestri teritori. Po al è il 8 par mil: di bande de Cei une cuote e rive a ogni diocesi secont il numar dai siei abitants, e une part di cheste cuote e va ancje ae Caritas. In ultin, a poiânus par dâ un past o une cjase a cui che i covente a son, midiant des convenzions di pueste, i ents publics tant che aziendis sanitariis, comuns, provinciis, regjons, Stât.
Ce fasie la Caritas a pro des lenghis minoritariis che si fevelin sul teritori de arcidiocesi di Udin, ven a stâi furlan, sloven e todesc?
Par esempli tal nestri sît internet www.caritasudine.it o vin scrit ad alt su ogni pagjine ancje «Caritas diocesane di Udin – Videnski Nadškofijski Karitas – Caritas der Diözese der Udine». Cun di plui o vin doprât chestis trê lenghis ancje tai manifescj che o burìn fûr sot Nadâl par domandâ un jutori ae int.
Lui al ten une rubriche su la Vite Catoliche che e à par titul «Cui voi dai piçui»: cemût ise nassude?
Un pâr di agns indaûr o vevi scrit, simpri par furlan, une riflession sui sants Ermacore e Fortunât, cussì il diretôr dal setemanâl de arcidiocesi di Udin mi à sburtât a tignî une rubriche fisse li che o feveli de cronache di ogni dì, de vite cuotidiane dai piçui che nissun al cognòs, des mês esperiencis cu la int. Mi plâs marcâ la religjositât de int comun; o disarès che e je une rubriche che, pûr fevelant di cuistions religjosis, no je clericâl.
Alessio Potocco

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +