SPECIÂL – La Associazion Teatrâl Furlane: un spetacul!

«Jessi o no jessi, chest al è il dileme». Cussì al diseve Amlêt.
Ma il teatri furlan al à decidût di jessi, fuart e presint, di deventâ une vere e proprie realtât, cun tantis compagniis che a zirin par dut il Friûl e no dome, a puartâ une forme di art che simpri plui e cjape pît, che e devente popolâr, par ducj. Une forme di art insome che no si siere dome intai vecjos teatris ma che si mostre al grant public cun ironie, fantasie e ancje cun tant impegn.
Chestis compagniis a àn decidût, di cualchi an in ca, di metisi insieme inte Associazion Teatrâl Furlane, organisim culturâl ricognossût a nivel regjonâl, che in dì di vuê al conte plui di 50 compagniis che a rivin des provinciis di Udin, Pordenon e Gurize.
Il principi di fonde de associazion, che e à sede in vie Manin a Udin, al è chel di valorizâ a ducj i nivei la lenghe, la culture e il teatri furlan, tignint cont des variantis locâls ma ancje de lenghe taliane.Vâl a dî, un mût di fâ culture sensibil al patrimoni linguistic de nestre tiere e viert a plui sperimentazions.
Se si va a viodi il lôr biel sît (www.associazioneteatralefriulana.com) si note bielzà lis tantis ativitâts dal grup, dal calendari dai spetacui aes produzions teatrâls plui ricercjadis. Nol mancje il marcjadut dal teatri, dulà che lis compagniis a puedin vendi, comprâ o scambiâsi materiâl, e parcè no, ancje meti inserzions par cjatâ gnûfs colaboradôrs.
O vin sintût par une piçule interviste il president de associazion, Renzo Lavia.
President, nus contial in pocjis peraulis ce che e je la ATF?
«La associazion e je nassude intal 1997 daspò che cualchi compagnie teatrâl e à decidût di metisi dongje par dâsi supuart. In dì di vuê, o vin cirche 56 compagniis che noaltris o sostignìn finanziariementri e cun colaborazions, metint a lôr disposizion laboratoris, conseis par podê miorâsi, poiis par meti in pîts simpri plui spetacui. Une robe impuartante di dî e je che ducj a son volontaris, no cjapin compens pal grant lavôr che a fasin, e a metin dome tante passion».
Di trop isal che al è president de associazion?
«O soi in carghe di ben undis agns in ca. Ma ancje jo o soi stât e o soi inmò un atôr atîf! Chest an o ai vint a Tresesin, cu la mê compagnie, il secont festival dal teatri amatoriâl furlan e cun di plui o ai vint ancje il premi come miôr atôr».
Cemût vadie la ativitât, ise in cressite?
«E sta lant benon! Ogni an o metìn dongje un centenâr di spetacui ator par dute la regjon. Propite cumò, o ai vude la conferme di une colaborazion cu la Comunitât Culinâr par diviers spetacui, segn che la richieste e je simpri plui fuarte».
Vêso tante int che us ven a viodi?
«O vin pardabon une grande afluence di public. Il teatri furlan al clame tante int, che e je simpri plui golose di sintî lis comediis e viodi i atôrs fevelâ inte lôr lenghe di ogni dì. A àn propit gust di viodi il spetacul ma soredut di sintî a fevelâ par furlan.Chest secont me al è parcè che si sta cjapant cussience de impuartance de nestre lenghe».
Dopraiso dome teatris o ancje altris spazis?
«In plui che intai teatris normâi, noaltris o lavorìn tai auditoriums, intes scuelis, in salutis parochiâls, insome, dulà che nus dan acet. Cu la biele stagjon, o fasìn tancj spetacui di fûr, intes placis, sot di tendons, intai zardins e ancje intal vert di cualchi biele vile».
Prossims progjets?
«O vin in pîts tantis robutis.Intant il mês di Març, in colaborazion cul teatri Giovanni da Udine, o metarìn sù un grant spetacul sedi par fruts che par grancj. Il mês di Mai, simpri al Giovanni da Udine, o fasarìn Teatro nel teatro ,o ben dutis lis nestris compagniis si alternaran a fâ spetacui di continui in ducj i spaziis disponibii, sul palc ma ancje tai jentradis, pai curidôrs: une grande fieste, insome.
Po dopo o larìn indenant cui nestris cors e laboratoris che o metìn a disposizion dai nestris iscrits: si tignaran in variis bandis, in particolâr intal teatri Luigi Bon di Culugne, ma ancje a Bertiûl e a  Codroip. In plui, tra Fevrâr e Març al sarà a Orsarie il tierç festival dal teatri amatoriâl furlan, dulà che a partecipin dome lis nestris compagniis».
Venusia Dominici