Sfuei Mensîl Furlan Indipendent
Archivi de Patrie

SPECIÂL. Il mestri dal orôr furlan

............

Se pensant a un regjist di film horror us ven tal cjâf Dario Argento, ben, par vuê dismenteaitlu. Lorenzo nol à nuie di mostruôs intor. Al à doi biei voi, grancj, che ti ipnotizin cuant che al fevele. Cualchi anel tai dêts, ben radât, disponibil. La uniche robe che e pues metiti un pôc in sudizion al è il studi de scuele dulà che al lavore. Scûr, plen di robis, une sorte di tane.
Lorenzo Bianchini al è il regjist di film horror plui brâf dal Friûl. Ma te vite, par tirâ indevant, al fâs l’assistent tecnic al Malignani di Udin. Lu vin incuintrât propit li, tai soteranis li che al à la sô stanzie, cul so non scrit parsore la puarte, un pôc scancelât. Cui sa se i tancj fruts che a passin pal coredôr a san che Lorenzo al è un pôc come Dr Jekyll and mister Hyde: di dì ju jude tal laboratori, dopo al cjape in man la telecjamare e al devente un regjist. Cuarante agns, nassût e cressût a Udin, Lorenzo al à tal so curriculum vot lavôrs, tra curts, medis e luncmetraçs.
Ce mut ise tacade cheste passion?
Cuant che o jeri piçul o lavi tal paîs di mê mari, a Montdiprât, parsore Nimis, e li i vecjos mi contavin leiendis popolârs plenis di misteri. Cussì a è nassude la mê “vocazion” pal horror, pal zâl e pal thriller.
Cuant âstu zirât il prin film e ti ispiristu a un regjist in particolâr?
Cuant che o ai comprade la prime telecjamare, tal 1996. No ai un artist che mi plasi disore di ducj: o ai cjalât tantis voltis “L’esorcista” di Friedkin, “Shining” di Kubrick e mi plâs une vore “La casa dalle finestre che ridono” di Avati.
Ce mût nassino lis tos storiis?
A scomencin di une imagjine. Un particolâr che o viôt e che mi fâs scatâ alc tal cjâf. Di chel moment alì mi partìs un percors: dut il dì o pensi e o torni a pensâ a la pussibile senegjature. Di solit o scrîf la storie di sere, anzit di gnot. Dispès no rivi a sierâ voli, o studi la lûs ma mi ziri e mi volti fintremai che o torni a jevâ e a scrivi.
Tu ti sês simpri autoprodot. Ven a stâi, nissun ti à judât economichementri a realizâ lis oparis. Cemût âstu fat?
Nol è facil, bisugne vê tante passion. I atôrs protagoniscj dai miei films a lavorin scuasit simpri a gratis; o cîr di sparagnâ su lis senegjaturis, mi fâs prestâ o o cjol a nauli i costums. Tes primis oparis, o creavi jo parfin lis musichis. E ancje cuant che lis robis a son ladis ben, come tal câs di “Lidrîs cuadrade di trê” che al à vendût une vore di dvd, no si cjate une cjase di produzion che ti dedi un sburt. In chest mont, purtrop, tu âs di vê cognossincis par fâ strade. Jo no lis ai!
Intun film horror a contin tant i efiets speciâi: disvelinus cualchidun.
Alore, jo o ai miôr di fâ intuî pluitost che di fâ viodi. Dut câs, par fâ cualchi esempli, pal sanc si pues doprâ il sirop di marene o il ketchup. Daspò, cuant che o ai scugnût fenzi un tai tes mans di une persone, o ai mandât un gno colaboradôr in becjarie a comprâ doi talpins di purcit…si sin rangjâts cussì!
In tancj dai tiei films, massime che che a àn vût plui sucès, tu âs doprât la marilenghe. Parcè? Ise une lenghe horror?
Ducj a tindin a associâ il furlan a une realtât rurâl, invezit no je cussì. Tes mês oparis al è stât cetant util parcè che al rindeve al miôr la atmosfere che o vevi voie di creâ. In “Lidrîs cuadrade di trê” o ai fat recitâ ducj in furlan parcè che al jere normâl sintîju fevelâ cussì. Al Malignani o sint tancj zovins fevelâ in marilenghe. E daspò chest mi a permetût di partecipâ ae “Mostre dal cine furlan”, inmaneade dal Cec.
Progjets pal futûr?
Tancj. O ai une vore di storiis butadis jù. Propit in chescj dîs o varès voie di scomençâ a zirânt une.
Valentina Pagani
___________________________________
LIS SÔS OPARIS
Dut al è tacât tal 1997. Cu la sô prime telecjamare al à zirât “Paura dentro”, un curtmetraç. La protagoniste, te part di une pitore, e je stade sô cusine. L’an dopo, tal ‘98, un altri curt: “Smoke allucination”. I atôrs a son trê amîs di Lorenzo. Simpri ta chel an, al zire “I dincj de lune”, prin medimetraç, dut par furlan; al dopre simpri so cusine pe part de protagoniste. Si fevele di une ricercjadore di leiendis popolârs che e va ator pai paîs a fâsi contâ de int chestis storiis. Il so obietîf al è chel di scrivilis dutis, cussì no van pierdudis. Ma no si sarès mai spietade di incuintrâ, te locande li che e durmive, propit un “om lôf” che, tes gnots di lune plene, al cumbine robis di ducj i colôrs. Cun “I dincj de lune” al partecipe pe prime volte ae “Mostre dal cine furlan” dal Cec.
Al partecipe e al vinç la mostre, invezit, tal 2000 cun chê che e je ancjemò la sô opare plui impuartante “Lidrîs cuadrade di trê”. Ambientade tai soteranis dal Malignani, e conte la storie di trê students che a àn di sostituî il lôr compit di matematiche, che ur è lât mâl, parcè che se no a riscjin la boçadure. Une volte jentrâts te scuele, la situazion a degjenere. Il film al ven butât fûr su dvd e al vent plui di doi mil copiis, in Italie e tal forest e il Corriere della Sera i dediche une pagjine interie. Al è dut par furlan, ma sottitulât par talian e par inglês.
Tal 2004 e je la ore di “Custodes bestiae”. Judât di un piçul contribût de Provincie di Udin, al fâs recitâ i stes atôrs che i àn puartât fortune in “Lidrîs cuadrade di trê”, che a fevelin sedi par furlan che par talian. La opare e à vint il “Toro film festival” di Turin. Tal 2006, al zire “Film sporco” e cumò al sta par finî la realizazion di “Occhi”, di produzion portughese, ambientât te vile Steffaneo Roncato di Crauì.
Valentina Pagani

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +