SPECIÂL. Il dotôr Spock al jere furlan

Il “Star Trek par furlan” (il non che i àn dât i autôrs al è STCJ: «Star Trek Chel Just», ndr) aromai lu cognossin ducj: cui no lu aial mai viodût o no aial mai sintût fevelâ di lui? La dopleadure in lenghe dal storic telefilm american di fantasience, fate di chei de Zuppotto Pacioso, e à fat scjas par dut il Friûl. La bande dai Zuppotto Pacioso e je un grup di amîs vuidâts di Stefano Turco che al veve za zirât cualchi cine amatoriâl e che, intun moment di ferme de produzion, al à decidût – duncje avonde casualmentri – di butâsi a fâ une dopleadure.
IL SUCÈS DI STAR TREK_I motîfs dal grant sucès no si capissin ben: il prodot al è goliardic (tant che al à ofindût cualchi furlanist) e cun cualchi batude avonde penzute. Forsit e à concuistât la sô grande spontanitât. Magari i à zovât il fat di vê metût dentri l’eterni teme dai furlans cuintri i triestins: i terestris a son furlans, i Romulans (i classics nemîs dal telefilm) a son triestins (e, par dî la veretât, scuasit a recitin miôr). Pues dâsi che si ves voie semplicementri di un prodot sclet e facil in lenghe.
Chê de dopleadure artesanâl no je une novitât a nivel talian: il sbassâsi dai coscj dai mieçs tecnics cu la digjitalizazion al à favorît dutis chestis produzions sul gjenar “fat bessôl”, ma il sucès e la imitazion discjadenade di «STCJ» a son pardabon di marcâ.
CHEI ALTRIS_Tal mâr di chestis produzions, no mancje cualchi “imitazion” realizade avonde ben. «Metrics» e je la parodie di «Matrix», che però dopo un biel inizi e naufraghe te lungjece dal film origjinâl. Biele la version di «Supercar» (telefilm american) clamade «Supercjar», cun dentri un goloseç une vore particolâr: il protagonist al impie la radio e si tache a sintî «Amôr o vencul», toc storic dal prin grup punk furlan, i Inzirli. Sburtâts dal public, i Zuppotto a decidin di fâ une altre dopleadure cuntune lôr version di une pontade dal telefilm «Starsky e Hutch»: dentri a metin ancje il cjargnel, il venit, il triestin, ma il sucès nol è chel di Star Trek.
THE SIMPSON’S_Par ultime, ma prime par cualitât, e je la dopleadure de serie dai Simpson: la mode e rive fin ai cartons animâts, duncje. Chest lavôr al rive a superâ i “mestris” Zuppotto Pacioso e ducj chei altris. La cualitât de recitazion e je une vore buine e lis vôs caraterizadis ben come te serie origjinâl. Ancje i tescj e i temis tratâts no disfigurin, creant une version pardabon furlane dal cartoon di Matt Groenig: forsit miôr de version taliane, parcè che tal test i autôrs a metin in ridi vite e maniis furlanis, propit come che la serie origjinâl e fâs cun chês americanis.
Sigûr però che il lavôr nol à la spontanitât un pôc smafare ma legre di Star Trek, che duncje al reste chel plui famôs.
Dree Venier