Sfuei Mensîl Furlan Indipendent
Archivi de Patrie

SPECIÂL – I Turcs tal teatri

............

Al è  un dai tescj teatrâi plui nomenâts, par vie dal so autôr. Ma al restà discognossût par agns, publicât dome dopo la muart dal poete. A so mût al à viert le strade al ricognossiment dal teatri furlan dentri de leterature. E al è scrit in marilenghe. Par capî di dulà che Pier Pauli Pasolin al à cjapat ispirazion pe sô piece teatrâl «I Turcs tal Friûl», si scuen lâ a Cjasarse e spiâ la Glesie, tirade sù viers la fin dal Votcent, cui claps de vecje Glesie «dal vôt». Si clamave cussì proprit parcè che chei di Cjasarse la costruirin par vôt, par jessi stâts sparagnâts de invasion dai Turcs dal 1494. Par memoreâ l’episodi, vuê, e reste dome la lapide cu la incision de viele dediche. Sul finî de seconde vuere mondiâl, po dopo, Pasolin al scrivè chest test. Si trate di un drame cun contignûts fuarts, siôr di une liriche che e mene indaûr ai grancj tescj de dramaturgjie greghe, cuntune poesie di valôr une vore alte e une scriture che e pant il stîl dal autôr, che plui tart al varà il just acet.
LA PRIME A VIGNESIE, MA INTAL 1976_La rapresentazion e fo in pratiche puartade ae ribalte internazionâl a Vignesie, intant de Biennale dal 1995, tal spazi de «Campanella», li dal Arsenâl, cu la regjie di Elio De Capitani. A seguirin replichis in Friûl, a Milan e Rome. Par chest, par tancj cheste rapresentazion e je considerade une prime. Ma la vere «prime» si metè in sene, ai 2 di Novembar dal 1976, prin aniversari de muart di Pasolini, simpri a Vignesie, te Gleisie di Sant Laurinç, in gracie ae sensibilitât dal regjist udinês, Rodolfo Castiglione e aes musichis di Luigi Nono. Il spetacul al puartave ancje un messaç di solidarietât intun Friûl sledrosât dal Orcolat e di fat al fo replicât te nestre Regjon, ma dopo chê stagjon sedi il test che la sô rapresentazion no varan altri seguit. Il scrit al viodarà la publicazion par cure di Luigi Ciceri dome tal stes an, daspò de muart violente, a Ostie. Des 2000 copiis metudis in circolazion di «Forum Julii», no si int’ cjate plui une.
«UN EVENT MEMORABIL»_Cun Elio De Capitani a lavorarin 40 atôrs furlans, professioniscj e filodramatics. Tra chescj, Lucilla Morlacchi, Giovanni Visentin, Fabiano Fantini, Renato Rinaldi, Francesco Ursella. Lis provis a forin organizadis a Sant Vît dal Tilment:  «Il debut ae Biennâl di Vignesie dai «Turcs» – al comentà il regjist – oltri al impat su la memorie coltive di chê esperience, al reste un document unic di un event memorabil». Une repliche te lûs dal soreli si fasè li dai Colonos, ai 25 di Avost dal 1996, un an dopo. «E jere une sfide – al contà in chê ocasion De Capitani –, ma ancje la prove che la «grecitât» che il zovin Pasolin al voleve perseguî cul so test, e cjatave un riscuintri tal rituâl che in chê ocasion si rivà a meti in vore cu la complicitât dai atôrs, dal public e ancje dai elements de nature, pronts a scjadenâsi a comant. Doplant il vint finâl che al slontane i turcs, chel de bielisime poesie musicade di Giovanna Marini, cuntun vint vêr e reâl e i prins lamps un temporâl estîf, che a sierarin cun efiet, une des plui bielis rapresentazion dal spetacul mai fatis».
INCUINTRI TRA DOI MONTS_La clâf dal scrit e sta tal incuintri tra i doi monts: turcs e paisans, invasôrs e invadûts. E la liende si intarsie cu lis vicendis personâls dal autôr. Propit cu la storie dai doi fradis: Meni che al sacrifiche la vite per combati l’invasôr e Pauli che al sielç di continuâ a lavorâ e preâ. Al scriverà Luzian Verone, te so «Rassegne di leterature furlane», che i «Turcs tal Friûl» e je une «opare di grande sugjestion, un viaç che Pasolin al fâs tal passât dal Friûl, cuant che insiemit a carestiis, pidimiis, taramots e malans di ogni  fate al scugnì sapuartâ ancje la malandrete invasion turche dal 1499».
Tal test si cjate dut: une metafore de vuere in cors, une premonizion de muart dal fradi Guido, copât a Porzûs, il strazi de mari, Susanna, destinade a continuâ a vivi rispiet ai fîs che e à gjenerât. E al sarà propit a cheste ultime figure che De Capitani al dedicherà il spetacul che al segnerà il tornâ su lis senis di cheste opare, scuasi discognossude, dal poete di Cjasarse.
Oscar Puntel

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +