Sfuei Mensîl Furlan Indipendent
Archivi de Patrie

SPECIÂL – Gnove urbanizazion: un disastri ambientâl visîf

............

Za di cualchi an al è vignût fûr un libri dal titul esemplâr, «Il grigio oltre le siepi»; titul che si ispirave a un famôs film, par marcâ la fagocitazion progressive dal teritori di bande di struturis urbanis e industriâls che a àn puartade la Planure Padane a jessi une grande e brute perifarie urbane, definide dal gjeograf Massimo Quaini «il piês dai ecomostris». Cuntun numar sproposetât di cjasis par famee e di cjasis vueidis rispiet al rest dal mont. Cheste situazion e cjape dentri ancje la Patrie. La fuarte cressite economiche no je lade parie cuntune cressite culturâl madure, rispietose dal teritori. Lis competencis in materie paisagjistiche a son stadis mâl dividudis jenfri Comuns, Provinciis, Regjons, soreintendencis… e malementri limitadis al vert e ai centris storics. Viodìnle in curt, par ponts.
PRIN PONT: LA INDUSTRIALIZAZION_ Tacade tai agns ‘60/’70, e à puartât svelte a un benstâ sociâl, a une cressite sdavasse e spietade che, in non dal progrès, e à incuinât il teritori.
Par esempli, la fabriche e ven fate cence la atenzion architetoniche dal ‘800, prin ‘900, co cheste e rapresentave ancje estetichementri la posizion sociâl dal paron che le curave, parie ae cjase là che al jere a stâ (dispès tacade ae fabriche). Conseguence: fabrichis brutis, fatis sù a coscj finalizâts al vuadagn e slontanadis dal tiessût urban in ariis specifichis. La fortune dal ûs e dal abûs dal prefabricât e je significative.
E je vignude a mancjâ la sensibilitât estetiche/etiche e la fabriche/centri comerciâl e je deventade nome un lûc di vore a cost bas, dispès emargjinât ancje dal lustri personâl: al baste savê di vêle. Salvant cierts grancj esemplis tant che la Snaidero o la Zanussi. Di plui: se l’incuinament teritoriâl al è stât frontât, l’incuinament visîf nol è mai stât cjapât in considerazion. Tant che lis cjasis li che si vîf: si bute il storic armonic par une polverizazion anarchiche o une banalizazion seriâl, valutade tant che progrès. L’impuartant al pâr che al sedi chel di sameâ modernis (ven a stâi, fâ sieltis tal ordenari), no spindi masse – soredut a nivel di progjetazion – e rispietâ lis pocjis regulis (sigurece e incuinament). Nol impuarte se po lis industriis a sedin cubis impersonâi e lis cjasis a samein barachis dal dopo taramot.
SECONT PONT: LA PROGJETUALITÂT_ A ‘nd è une dubie capacitât progjetuâl e di costruzion armoniche dal teritori di tantis aministrazions e il fat di no vê une responsabilitât estetiche su ce che al ven fat sù – di public o di privât – si no in cualchi centri storic. Lis zonis di gnove urbanizazion no si les cjape in considerazion («voli nol viôt…»). O sin lontans, par esempli, dal model bavarês dulà che e pese ancje la tipologjie dai arbui.
Un esempli al è Cormons. Li i aministradôrs, par ricualificâ la aree de vecje caserme (sù par jù 60.000 metris cuadris), no àn cjatât nuie di miôr che lâ a sintî in maniere acritiche la int. Cence un progjet comunâl di base. Come se l’aministradôr di un condomini, devant di une scugne, si presentàs in assemblee cence soluzions di discuti ma al les a interogâ il mont par savê ce fâ.
I aministradôrs a àn vût biei vantaçs de urbanizazion salvadie: contentâ i pussibii eletôrs e no stiçâju contestantjur il progjet (al coste mancul fâ deventâ residenziâi terens agricui, pluitost che ristruturâ l’esistent); fâ casse cui oneris di urbanizazion (si impensaiso i corots cuant che a àn abolide la ICI?) e un tacon par belançs disperâts: ciertis gnovis urbanizazions a son nome un dividi ce che e jere campagne ma a jentrin chel istès tal belanç previsionâl comunâl par dreçâlu a spesis dal teritori.
TIERÇ PONT: LA ARCHITETURE_ I architets no samein plui bogns di dialogâ ni cul teritori ni cu la urbanizazion presinte. Il dât plui evident si lu à te Postdammerplatz di Berlin là che a son rapresentadis dutis lis tipologjiis architetonichis, bielis singolarmentri, ma orendis tal insiemit. In Friûl, un esempli lu cjatais simpri a Cormons te ricualificazion di place Libertât: li la grande pensade e je stade chê di segnâ i spazis cun desenis di panetons di metal che a oblein a cjalâ in bas (almancul par no inçopedâsi), distruzint ogni ecuilibri estetic dal insiemit.
Ma o crôt che ogni paîs al puedi dî la sô.
Di plui, intune architeture moderne e samee pierdude la funzion estetiche des alçadis des cjasis. No par câs, tes mostris, co si presentin i modei, chescj a vegni par solit fats viodi dal alt  come se  nô o fossin uciei e che la cjase no le viodedin dal bas viers l’alt e che cheste e sedi nome planimetrie.
E mancje la scuele e il coragjo de Secession, tant par no lâ masse in là cul timp.
Si scuen dî che ancje i furlans a metin dal lôr, in gracie de lôr scjarse culture estetiche e dal lôr «mâl dal modon». A son braurôs de brute vilute che ju riscate di un passât modest e a contestin struturis di une cierte elegance tant che la Hypobank di Tavagnà, taponant i voi devant a chê specie di bidonville che i sta intor.
La conseguence di dut chest e je sedi la distruzion e la pierdite di identitât de Patrie, sedi un ridot interès turistic e de cualitât de vite. Cul risultât che ancje modestis cjasis vecjis e di clap, dispès brutis, a deventin emotivementri interessantis.
Sandri Di Suald
______________________________
Une buine iniziative
Un dai vandalisims dai ultins agns al è stât chel di no tignî in bon lis costruzions plui resintis, chês dal Nûfcent, che in tantis a son stadis sdrumadis par fâ puest a brutis palacinis. Il Comun di Udin, daûr pression de Consulte de Culture, si à cjapât a cûr chescj edificis e une targhe e indiche diviers di lôr, insieme cul an di costruzion e il non dal architet.

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +