Sfuei Mensîl Furlan Indipendent
Archivi de Patrie

SPECIÂL – Fantats Furlans: nassûts par crevâ e vonde

............

Promozion e tutele de lenghe a son i obietîfs des leçs statâls e regjonâls di setôr. Te plui resinte, la Leç regjonâl 29/07 (Normis pe tutele, valorizazion e promozion de lenghe furlane), si fevele adiriture di un regjistri di volontaris pal insegnament de lenghe. Une idee cjapade ad imprest de Catalogne, pecjât che di dut chel panorame complès che e je la politiche linguistiche catalane, chest al sei l’unic element cjapât a model. Come che si à ricuardât plui voltis, la Leç 29/07 no je ancjemò stade metude in vore, in spiete che la Cort Costituzionâl si esprimi sui cuatri ponts impugnâts; par tant, ancje il regjistri dai volontaris, cundut che nol jentre tai ponts contestâts, pal moment al è ancjemò une ipotesi.
E pûr, zaromai di agns a son associazions che, cence gjoldi di finanziaments publics, a lavorin cun sucès pe promozion de lenghe in tancj setôrs de vite di ogni dì.
L’esempli dal sigûr plui cognossût al è chel dai Fantats Furlans, la prime clape che e lavore di bessole, come che si lei tal lôr sît Web (www.faf.too.it): une associazion cence fins di vuadagn, nassude cul fin di promovi la identitât e la culture furlanis. Viodudis lis tantis iniziativis metudis in vore e i risultâts otignûts, i Fantats Furlans a puedin jessi ben braurôs de lôr ativitât indipendente e autonome.
In passe dîs agns di ativitât, chest grup di volontaris al à produsût pardabon tant materiâl, rivant a vê une buine visibilitât e a cjapâ dentri int di etât difarente, in particolâr i zovins. Un risultât une vore impuartant, soredut se si considere che i fantats a son chei che plui dispès a restin fûr des azions di politiche linguistiche, par solit indreçadis ai fruts plui piçui. Une sielte di marketing intivade: materiâi biei, simpatics e divertents, cuntune grafiche curade e une distribuzion ben pensade, di mût che al sei facil cjatâju. Dutis carateristichis che, magari cussì no, masse dispès no si cjatin in altris prodots in marilenghe.
No dome maiutis, adesîfs e gadgets ma ancje libruts svelts e plasevui tant che Fregul, stampât sul model de golaine Mille lire, che a dimostrin cemût che si pues frontâ cualsisei cuestion in marilenghe: de storie dal Friûl al lengaç de politiche. Cun di plui, lis ultimis edizions a son disponibilis sedi su cjarte sedi in formât eletronic, une sielte strategjiche pe lôr difusion. La ultime iniziative comerciâl che e à pardabon un grant sucès e je la realizazion des bustutis pal zucar «Cemût sêstu vuê?», che si cjatin bielzà intune vore di locâi furlans, e che a vegnin domandadis simpri di plui.
Tai agns, i Fantats Furlans a àn vût colaborât cuntune vore di associazions e realtâts furlanis, tant che Radio Onde Furlane, l’Istitût Ladin Furlan «Pre Checo Placerean», la Academie dal Friûl e vie indevant, ma ancje europeanis.
Di fat, tal 1995 a àn partecipât ae cunvigne organizade dal YEN (Youth of European Nationalities), la associazion che e met dongje i zovins europeans che a fasin part di une minorance. Une esperience uniche pardabon pôc cognossude e che invezit si varès vût di sfrutâ une vore di plui.
Dal libris ai vistîts, passant pal stadi e pes musichis pai telefonuts: dut al pues jessi fat par furlan, e ancje ben.
Lu dimostrin i Fantats Furlans.
FEDERICA ANGELI

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +