SPECIÂL – Cence di lôr, nuie sport diletantistic

A son une sdrume. Dome te provincie di Udin, 578. Lis associazion diletantistichis a son il pont di fuarce dal volontariât tal sport. Par vie che lis stessis no esistaressin cence chest esercit fat di presidents di societâts, di colaboradôrs, di diretôrs. Un mâr di esemplis: dai zovins che a insegnin ai plui piçui a tirâ lis primis pidadis al balon, a chei paris o a chês maris che a vuidin il furgon la domenie par ritirâ i atletis di une polisportive. «Supuart logjistic», ma salacor ancje assistence fisiche, vicinance psicologjiche. «Un mont paralêl – al spieghe il president dal comitât provinciâl dal Coni di Udin, Silvano Parpinel – che se nol fos, al metarès in pericul la stesse struture che e sta sot dal Coni. No je dissipline sportive che no si davuelzi in gracie dal volontariât: si va des associazions peadis ae federazion fintremai ai ents di promozion sportive».
PAI ZOVINS_ No si fevele, clâr, dal mont dai professioniscj; il fenomen si concentre in chê macro aree de promozion tai setôrs zovanîi, massime a nivel scolastic. Si fevele massime di bale a svol, bale tal zei, e de corse in mont e dal schi tai paîs dal Friûl di mont. «Ma – al sclarìs Mario Martini, president onorari dal Comitât furlan de Figc, Leghe nazionâl diletants – o pensi che al sedi un fenomen leât soredut tal mont dal balon. In plui dai dirigjents tecnics, o pensìn ai frutins di 5 agns che a zuin a balon, tun cjamp tal viert. O vin volontaris che a preparin il cjamp di zûc, chei che si ocupin dal disvistidôr, chei che a van a cjoli i fruts a cjase. Duncje i familiârs ju lassin tes lôr mans, savint che si cjatin intun ambient san, trancuil e dulà che si fâs sport». Difarent il mont dai tecnics e dai alenadôrs, dulà che za si domandin «rimbors di spesis», ancje se minims.
I RISIS_ Volontariât, va ben: ma i risis?
«O podaressin tirâ dongje une leterature des lôr responsabilitâts civîls e penâls – al dîs Parpinel –. Ducj a son sot di une ombrene assicurative globâl de federazion, che e cuvierç ben pôc se si pense a dut chel che al pues tocjâ. Come Coni o organizìn seradis di aprofondiment par sensibilizâ e inzornâ i volontaris sul teme».
Oscar Puntel