SPECIÂL – Bionde, ma no dome

Biondis, rossis. Naturâls, vignudis sù in cjase, o citadinis, cressudis ator pal mont. Cualchidune e profume di mont, cualchi altre e à snait, e à lis bufulis, ma e je ancje chê clare, lizere, di gjoldi. A son tantis. Diviersis. Ognidune un caratar.
Dutis, però, cul stes efiet sui oms: ur lassin lis mostacjis blancjis di sbrume.
Il Friûl al è tiere di bire. Moretti, Castello, a son nons che a fevelin di bessôi. Ma ancje Zahre, Foglie d’erbe, gnovis produzions rigorosementri furlanis.
INDAÛR TE STORIE_ La plui antighe e je che dal «baffo». Par contâ la sô storie bisugne lâ indaûr al 1859, cuant che Udin e jere ancjemò sot l’imperi austroongjarês. Un sioret cu lis mans dentri dapardut – al vendeve e al comprave vin, licôrs, al jere un afarist – al à pensat ben di fâ sù une fabriche di bire. I plaseve, al leve simpri a comprâle in Austrie, ma nol veve plui voie di fâ tante strade par bevile. Luigi Moretti, al veve non cussì. In chê volte al veve 37 agns e forsit nol pensave che la sô idee, 150 agns daspò, e sarès stade ancjemò in vore. La bire Moretti le cognossin in dut il mont. Sigûr, il stabiliment al è passat di man in man, di gjestion in gjestion (dal 1996 al è de Heineken), ma Udin lu à tignût a batisim. E chel om cu lis mostacjis che le bêf, te etichete de butilie, al à fat di santul. Si conte che tal 1942, Lao Menazzi Moretti, un comendatôr, al à viodût un vecjut simpatic, cu lis mostacjis, sentât suntun taulin fûr di une ostarie, a Udin. Il comendatôr, che nol jere stupit, al à pensât dal moment che chel om li al podeve rapresentâ ben la sô bire. Alore i à domandât se al podeve fotografâlu e ce ricompense che al veve voie di vê. E il nonut, bon furlan, al à rispuindût: «Che mi dedi di bevi, mi baste». La sô foto e à fat il zîr dal mont. Tai agns il «baffo» al è stât interpretât di diviers atôrs: cumò al à la muse di Orso Maria Guerrini.
LA ULTIME TINDINCE_ Al à la barete rosse, lungje e lis orelis a spice, invezit, il simbul de bire Zahre. Al è un folet che al ven fûr de valade dal Lumiei, come la aghe che e sgorgole li frescje, che e beche, e che e rint cussì particolâr cheste bire, che e puarte il non par sauran dal pais li che e je  produsude, Sauris.
Naturâl, cence conservants, e va tignude in frigorifar fin a un massim di 6 mês. E je nassude tal 1999 di une idee dai trê imprenditôrs che ancjemò vuê le manovrin. «Une bire artesanâl, integrâl, che no ven pastorizade e nancje filtrade» – al spieghe il «mestri birâr», Sandro Petris. Si le cjate là sù, in chel biel puest di pierdisi che al è Sauris. Chel Disore, pe precision, li che al è il stabiliment. In butiliis di veri blanc o ros, scuridis par fâ in mût che la lûs no ruvini il prodot.
Ma fevelant di bire artesanâl no si pues dismenteâ il «Bire», in viâl Osoppo, a Udin. Locâl storic dulà mangjâ e bevi une bionde o une rosse fatis in cjase.
E ancje Resiute, tal so piçul, e à il so birifici. «O vin tacât a fâ bire tal 2001 – al conte il mestri birâr, Massimo Beltrame, titolâr dal ristorant «Al buon arrivo» – e o rivìn a fâ dai 35 ai 40 mil litris ad an». Doi gjenars, sui 5 grâts alcolics: une pils e une ambrade. No à conservants e e je pôc gasade ma e je alc e ce insieme cul poleç rustît che si mangje li.
IL BOSC TE BIRE_ Altris savôrs, altris colôrs pe bire che si bêf a For Disore, chê di Gino Perissutti. La sô e sa di bosc. La «Haraban» e je aromatizade cu lis guselis dai pins silvestris, clare, lizere. Dopo e je la «Hopfelia», ambrade, fate cu la resine dal alaç e la «Ulysses», plui penze, scure, siet grâts e mieç di alcul, e dentri il savôr de scuarce di peç blanc. Gino al à simpri vude la passion pe bire: chei che a cognossin il so hotel pizarie «Colon», li a For, lu san ben. Ti da di sielzi tra 150 cualitâts. Cumò però al va ancje a cjapâ sù, tai boscs di chenti, pomulis e resinis pe sô piçule. Che al vent ae spine tal locâl, e in butilie a chei che le ordenin sul sît.
Cumò si sin pierdûts un pôc ator pal Friûl. Ma o vevin tacât fevelant de regjine des biris furlanis, la Moretti. Vuê di Moretti, a Udin, al reste un biel parcament. Tai agns novante la sede produtive si jere spostade a Sant Zorç di Noiâr, te basse. La produzion, come che o vin dit, e je passade ae Heineken ma il stabiliment al è stât comprât di furlans. Al è ancjemò vîf e atîf. E lôr, furbos, a àn «robât» dut il «know how», il savê fâ, de Moretti e cumò i dan di spine, ogni an, a un milion di etolitris di Castello.
Valentina Pagani