SPECIÂL BIBIE – Vôs dal popul, vôs di Diu

La leture continuade de Bibie e à jemplât la glesie de Puritât no dome de vôs dai letôrs. Di fat l’event al à vût ancje moments musicâi e tra chescj il public presint al à podût gjoldi di une biele anticipazion: il Coro Rosas di Mont di Guart diret di pre ‘Sef Cjargnel, di simpri impegnât tal studi e il recupar de musiche liturgjiche furlane, al è daûr a publicâ un dopli CD par cont di Glesie Furlane cui cjants liturgjics tradizionâi dal Friûl.
Une vore che e va indevant di cualchi an e che e sarà presentade ca di cualchi mês.
Ma intant il master al jere za pront e cussì al è stât metût a disposizion de organizazion che lu à doprât par compagnâ i moments di interval tra la leture di un libri e chel altri.
«Chescj cjants si caraterizin pe lôr vene spontanie e gjenuine che ti da chel gust di cjase» nus spieghe pre ‘Sef. «E je musiche che ti va drete tal cûr parcè che e à ducj i elements tipics dal nestri jessi furlans che ancje te religjon o vin metude simpri la cordialitât e la intimitât cence colâ in esaltazions e esagjerazions: si trate di cjants cun armonizazions spontaniis des vôs che a rimandin a la fisionomie culturâl dal popul furlan» al siere pre ‘Sef.
Christian Romanini