SPECIÂL BIBIE – GLESIE FURLANE. No sta fermâti mai

Par un papà e une mame la nassite di un fi e je come tocjâ la lune cul dêt, come cerçâ un sclip di Paradîs: un event maraveôs, un grant e radicâl gambiament di dute la lôr vite. Che, se cussì nol fos e dut continuàs come prime, alore, il frut nol rivarès a madurâ e lôr a saressin responsabii di vê trascurade e tradide chê creature.
Passant dai paragons ai fats, o stoi cjacarant dal event de leture integrâl de Bibie par furlan: un grant avenimet che al è dome di congratulâsi cul ARLeF e cul nestri popul.
Mi domandi però: mame e papà cemût àno cirût di fâlu cressi?
Pari di un popul a son i siei sorestants, lis istituzions civîls, la scuele di ogni ordin e grât, i responsabii de pulitiche, de culture, de lenghe: mi somee che l’event Bibie, no ju vebi nancje tociâts inte lôr tradizionâl trascuratece.
Mari di un popul e pues jessi la glesie, ma chê no à mai dade la vite pe cuestion furlane. Cuant che al jere vîf pre Antoni a son sucedûts moments di altissime tension tra il vescul cu la Curie di une bande e pre Antoni cul grop di Glesie Furlane di chê altre. In chê volte a disevin che se la realtât furlane no progredive e jere colpe nestre, e che, se o vessin ubidît, Rome nus varès dade la lune tal poç. In chescj agns no viôt il nestri grop a butâsi cuintri dal Pape o dal Vescul, epûr il Messâl furlan al è intun cjanton a Rome e in Diocesi, pal furlan, nuie al à progredît. O ai let i discors fats in ocasion de visite di Pape Benedet XVI a lis glesiis dal Nordest: no ai cjatât un pinsîr che al judi a viodi in maniere gnove lis minorancis e la glesie locâl.
Cuant che o jeri frut, mê mari ogni tant e faseve une fuace, un pan dolç cussì biel e saurît che lu viôt e lu gusti ancjemò. Ma chê fuace no gambiave la miserie de int dal   paîs. La liberazion di un popul, no si ridûs a une zornade o a un dolçut. L’event de Bibie al è impuartant e valit; al reste come lis boris prontis a ardi se si metin cuatri stecuts, ma lis istituzions civîls e glesiastichis a butin la cinise par che il boreç nol vebi a cjapâ fûc iluminant la nestre gnot. L’event al è une rose, ma ai vuardeans no ur interesse di jê.
Pal moment in cheste nestre societât une gnove vision, alternative, di culture e di mont no je buride fûr: continuant cussì, nus ridusaran cence muse e cence avignî.
E l’event de Bibie nus vise di no iludisi pal moment de conversion dai grancj; la nestre fuarce e reste ancjemò te resistence de int.
E dîs mari Taresie di Calcute: “No sta rassegnâti a jessi compatît; fâs che ti puartin rispiet; no sta fermâti mai”.
pre Tonin Cjapielâr