Tecnologjie par vinci

L’argoment plui cjacarât ta la campagne eletorâl a pene passade nol è stât il lavôr, o lis infrastruturis. No je stade la imigrazion e nancje la economie de nestre la regjon. No: ce che al à plui di dut tirât sù un davoi in Friûl al è stât il gnûf stadi Friuli.
E ancje se no crôt che e sedi la robe plui impuartante par la nestre tiere, ancje a mi, o ai di ametilu, mi plasarès viodilu fat, chel stadi futuristic che a àn progjetât. Tant par scomençâ, finalmentri al sarà dut cuviert, e cun dute che ploie che o ai cjapât cuant che o jeri abonade, chel li a sarès propit un biel gambiament. Vêso mai fat câs che a Udin al plûf une domenie sì e une no, e che la domenie no al è simpri cuant che o zuìn fûr di cjase?
Cun di plui, no si fevele nome di fâ sù une cuviertidure, ma a saressin ancje un grum di soluzions par fâ deventâ la struture autonome cu la energjie in ducj i mûts pussibii: no nome panei solârs e fotovoltaics, ma ancje un sisteme par cjapâ sù e doprâ di gnûf la aghe da la ploie (par dî la veretât par chê robe li no coventave cuissà ce tecnologjie: al sarès bastât striçâ chei che no viodevin la partide in tribune: jo, ancje se o vevi simpri cun me un impermeabil, o puartavi a cjase almancul doi o trê litris par volte.
Fintremai, cui che al à progjetât il gnûf stadi al à pensât ancje a un sisteme che al tegni il public cjalt di Unviêr e fresc di Istât, e se par il prin probleme i cumbinavi ben ancje prime, parcè che il gno vicin di puest mi ufrive simpri une tace di vin brulè, pal secont e sarà di sigûr une robe buine.
Dut ator dal stadi, a disin che a vignaran sù negoziis e palestris, par podê doprâlu ancje vie par la setemane. Cumò: a part che a sintî cheste spiegazion mi ven di tocjâ fier, parcè che o speri ben che il stadi lu doprarà il plui pussibil ancje di martars e miercus, l’Udin, ma chê robe da la palestre no rive a convincimi masse. Sarà parcè che cuant che o voi al Friuli, il massim sport che o ai voie di fâ al è bati lis mans, e cuant che e je di fâ la ola, o aceti nome parcè che al vûl dî che o stin vincint alc di grues.
Dut câs, il stadi al sarà pardabon une biele novitât pai tifôs e par dute la regjon. Nome une robe mi domandi, dopo che o ai viodût trop che a falin i nestris dongje da la puarte: ma cun dutis chês invenzions, pussibil che no si rivi a cjatâ il mût di fâ lâ il cjamp di rive in jù de bande che al à di segnâ l’Udin?