SLOVENIE. Si vierç il gnûf an scolastic: i numars de scuele slovene

Cul tacâ dal gnûf an scolastic 2017/2018 l’Ocse al à publicât il studi Education at a Glance 2017″ che al analize e al compare i sistemis di istruzion e di formazion intai stâts membris e intai paîs partners. A son stadis cjapadis in considerazion, par altri, lis risorsis finanziariis e umanis impegnadis intal setôr de istruzion e la organizazion dai sistemis scolastics.
In Slovenie il sisteme educatîf di istruzion e di formazion al è dividût in cuatri nivei: prescolastic, elementâr (nûf classis), medi (cuatri classis) e terziari. Al va zontât che lis comunitâts minoritariis taliane e ongjarese a àn dirit ae educazion e ae istruzion inte proprie marilenghe. Par esempli, iIntai teritoris dulà che e je insediade in sens storic la comunitât taliane, a son scuelis cun lenghe di insegnament taliane, il talian però al ven insegnât tant che lenghe di ambient ancje in chês altris scuelis, intant che in altris teritoris al ven proponût tant che lenghe foreste.
La istruzion prescolastiche, ufierte di 387 istitûts (e di chei, 85 a son privâts) frecuentâts di plui o mancul 85 mil fruts, no je obligatorie e e je destinade ai fruts di un a sîs agns. Secont il rapuart de Ocse, la Slovenie e à spindût intal 2014, di fonts publichis e privadis, l’1,3% dal PIL pai istitûts di educazion prescolastiche (lis mediis Ocse e EU22 a jerin dal 0,8%). Intal 2015 il 69% dai fruts di doi agns al frecuentave i asîi (la medie Ocse e jere dal 39%, chê EU22 dal 35%). Miôr risultâts a son stâts otignûts dome in Svezie, Danimarcje, Norvegje e Islande. Par ce che al tocje i fruts di 5 agns, la percentuâl di inclusion intai programs di educazion prescolastiche in Slovenie e jere dal 92% (la medie Ocse e EU22 e jere in chest câs dal 95%).
Escludint il nivel prescolastic, l’Ocse al à rilevât invezit che la Slovenie e à destinât intal 2014 ae istruzion il 4,6% dal Pil (la medie Ocse e je dal 5,2 % e chê EU22 dal 4,9%) o sedi il 8,7% de spese publiche. Al va zontât che intal 2010 cheste percentuâl e rivave al 10,1% e che il câl fat regjistrâ de Slovenie al risulte chel plui alt inte aree Ocse. Chescj dâts a son stâts sotlineâts ancje dal sindicât dal personâl docent sloven che propit pe Zornade mondiâl dai insegnants (ai 5 di Otubar) al à anunziade une manifestazion di proteste par domandâ che il lavôr dai insegnants al vegni retribuît in maniere adeguade: la paie medie di un dipendent statâl sloven cun istruzion universitarie e je di 2.287 euros, intant che chel dai insegnants al è in medie plui bas di plui di 500 euros.
In merit aes scuelis elementârs, il Ministeri de istruzion al à fat savê che i fruts che lis frecuentin a son cuasi 180 mil e il materiâl didatic di chest an al è gratuit pai arlêfs des primis classis. Lis scuelis elementârs a son in totâl 455, cun 6 di chês privadis, ma a chest numar a van zontadis ancjemò 318 sedis distacadis. La scuele plui grande e je frecuentade di 1.002 arlêfs, chê plui piçule di 27, intant che par ce che al tocje lis sedis distacadis, chê plui grande e à 305 iscrits, chê plui piçule dome trê. Su la base dai dâts Ocse, il numar medi di arlêfs par sezion al rivave intal 2015 a 19 intes primis sîs classis (cicli primari), e a 20 de setime ae none (cicli secondarie).
Lis scuelis mediis superiôr (111 publichis, 6 privadis e 6 par students cun disabilitât o cun dibisugnis particolârs) a son frecuentadis chest an di plui o mancul 74 mil students. Tra lis novitâts proponudis, la introduzion in vie sperimentâl dal praticantât pai profîi professionâi ca sot: modeladôr di metai/fabricant di imprescj, taiadôr di piere, marangon e gastronom/gjestôr di albierc. Cualchi scele medie superiôr e à rinovât invezit il program didatic: par esempli, intes areis bilengâls de Istrie slovene i istitûts tecnics e professionâi a varan dôs oris di lenghe taliane in plui a setemane.
✒ Tjaša Gruden