Sfuei Mensîl Furlan Indipendent
Archivi de Patrie

SLOVENIE. Par Janez Janša e je rivade la condane

............

Un condanât in vie definitive a plui di sîs mês di reclusion (e che al è daûr a scontâ la pene) nol pues vê il rûl di parlamentâr. Il parlament sloven, cjapât at de opinion di une comission di juriscj istituide ad hoc, al à decidût di revocâ il mandât al ex prin ministri e leader de oposizion (e dal secont partît dal paîs aes elezions politichis di Lui) Janez Janša, che al è daûr a scontâ in preson la pene detentive di doi agns che i è stade dade intal procès par coruzion sul affaire Patria. Il leader dai democratics slovens SDS (in Slovenie partît di diestre) al varès, daûr dai judiçs che lu àn condanât, acetât une promesse di coruzion intant dal so prin mandât di prin ministri (tra il 2004 e il 2008) par favorî la aziende finlandese Patria, furnidore di 135 cjararmâts blindâts vendûts al stât sloven. Il câs al à vût pleis penâls ancje in Austrie, cu la condane dal mediatôr Hans Wolfgang Riedl, e in Finlande cu la assoluzion dai protagoniscj slovens. In Slovenie Janša, ce che al à ricorût in apelazion ae Cort Massime (il coleç al à decidût za sul câs, ma la sentence no je stade fate ancjemò publiche), al è stât definît da siei sostignidôrs un presonîr politic. La vicende e à vût un rivoc ancje al parlament european e tra lis autoritâts eclesiastichis, là che si à fevelât di grancj pinsîrs pal futûr dal stât di dirit in Slovenie.
La revoche dal mandât di Janša, che fin cumò al è stât elet simpri in parlament e aes ultimis elezions politichis al veve vût plui di 6100 preferencis, e je stade votade di 58 parlamentârs, 6 a àn optât pe conferme, chei altris no jerin presints ae votazion (il parlament sloven al è componût di 90 deputâts). Il grop de cuistion al è inte regolamentazion dal eletorât passîf in Slovenie. La leç che e regole lis elezions slovenis no improibìs ai condanâts in vie definitive di candidâsi, ma la leç che e fisse lis carateristichis pai deputâts e previôt la decjadence dal mandât tal câs di condane definitive a plui di sîs mês di reclusion cence la condizionâl (a mancul che il parlament nol decidi in altre maniere). Chest però dome intal câs là che la condane e sucedi dilunc dal compiment dal mandât. Diviers juriscj e costituzionaliscj, dopo la elezion di Janša, si son esprimûts intal merit o sedi se la revoche dal mandât, in chest câs, si podès aplicâ o mancul. E i sostignidôrs di Janša a àn plui voltis sotlineât, citant lis opinions dai esperts di dirit che a àn sostignût la inaplicabilitât de leç, cemût che ni la Costituzion e nancje altris leçs a dedin motivazions reâls che, su chê fonde, al leader di SDS al ves di jessi gjavât il seç in parlament. Cu la decjadence dal mandât, a àn ribatût, a saressin stâts ofindûts i dirits di plui di 6 mil citadins che a àn sielt Janša tant che propri rapresentant in parlament. Al sarès stât, secont lôr, dopo la condane par coruzion, une altre prove de bande de çampe di eliminâ un aversari politic.
L’intindiment dal legjislatôr al somearès invezit clâr: un condanât nol pues vê un seç in parlament. Ma in maniere palese al moment de scriture de leç nissun nol veve previodût che un condanât che al è daûr a scontâ la pene detentive al podès candidâsi, dant par scontade une sielte di gjenar etic. E sarès in ogni câs necessarie une regolamentazion plui clare e mancul incomplete dal eletorât passî,f in mût di evitâ in futûr câs simii. A evidenziâlu al è stât il stes president dal parlament sloven Milan Brglez, che al à augurât cun di plui che la Cort costituzionâl, se interpelade in materie, e decidi intal timp plui curt pussibil.❚
Tjaša Gruden

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +