SLOVENIE – La promozion turistiche slovene e ponte sul virâl traviers i social network

Intant che in Friûl la Agjenzie Regjonâl Promotur e je tal mieç di une bufere, ma no di nêf, cul belanç congjelât, di là dal clap in Slovenie si sperimentin gnovis strategjiis par promovi il turisim invernâl. Il Slovenian Tourist Board al à vût la idee di promovi il Paîs tant che mete pai sports invernâi doprant la viralitât dai social media. La campagne clamade #winterslovenia (come i “hashtag” che si doprin su Twitter, ven a stâi la clâf di ricercje par cjatâ un argoment) e je stade presentade prime di Nadâl traviers di Twitter, apont, cirint di smicjâ a utents di alt profîl, gjenerant passe 1.500 tweets e rivant in totâl a passe 400.000 twetters. La strategjie e previodeve ancje di doprâ Instagram (un social network fondât su la fotografie, ndr), par promovi la Slovenie traviers lis imagjins scatadis dai residents e turiscj. In dome 20 dîs di campagne a son stâts regjistrâts numars straordenaris (passe 1 milion e mieç di impressions par #winterslovenia). Une campagne pardabon ben petade, che e je stade buine di puartâ la Slovenie ae atenzion dai turiscj propit dongje dal periodi li che a decidevin ce fâ pes feriis di Invier.