SLOVENIE. Il contribût furlan e talian ae indipendence de Slovenie

Ancje se cun cualchi division a nivel di dialetiche politiche interne, ae fin di Jugn la Slovenie e à fat fieste pai siei trente agns tant che Stât indipendent. Ai 25 di Jugn dal 1991, di fat, il Parlament di Lubiane al proclamà la indipendence de Slovenie de Jugoslavie, su la fonde dai risultâts dal referendum di sîs mês prime. In chê volte, al veve votât pe indipendence l’88,5% di chei che a vevin il dirit di vôt e il 94,8 % di chei che a jerin lâts a votâ.
L’esercit de Jugoslavie al atacà la Slovenie bielzà la dì dopo. I cjars armâts a ocuparin i passaçs di confin; i avions militârs a svolarin parsore di dut il Stât. A forin ancje combatiments e vitimis.
◆ Ai 26 di Jugn il gnûf president de Republiche di Slovenie, Milan Kučan, ae cerimonie denant dal Parlament di Lubiane al disé: “Vuê nus son permetûts i siums, doman e je une gnove dì”.
◆ Pôcs a crodevin che la Slovenie, di tant piçule che e jere, je varès fate. Ma la difese teritoriâl e difindè cun inteligjence il gnûf Stât. In dîs dîs il nemì al tornà tes casermis e al bandonà la gnove Republiche.
◆ Fintremai chel moment, cuasi dute la politiche mondiâl e jere stade de bande de Jugoslavie, a nivel uficiâl ancje chê taliane. In Italie grant sosten ae Slovenie al rivà, invezit, a nivel locâl, soredut de bande dal Friûl-Vignesie Julie e dal Venit. I presidents di chê volte des dôs Regjons, Adriano Biasutti e Gianfranco Cremonese, a rivarin fintremai a lâ a Lubiane vie pe vuere. Tal cambiament des posizions dal guvier talian in merit ae indipendence de Slovenie e ve cetante influence ancje la azion dal ministri Carlo Bernini.
◆ Clâr che solidarietât ae Slovenie e rivà de bande des zonis dal Friûl-Vignesie Julie li che e je la minorance linguistiche slovene – de Valcjanâl, passant par Resie, la Sclavanie e fintremai aes zonis di Gurize e Triest -. Cetancj conseis comunâls a aprovarin risoluzions cuintri dal atac militâr ae Slovenie e par sostignî la indipendence. Dispès ancje la glesie locâl si impegnà par sostignî i vicins.
◆ “Cussì o vin inverât i siums, che par secui a àn sumiât i nestris vons” al à dit Lojze Peterle, il President dal consei dai ministris tal guvier, che al è rivât ae indipendence de Slovenie. ❚