Sfuei Mensîl Furlan Indipendent
Archivi de Patrie

SLOVENIE. Il belanç de Slovenie al Expo

............

Plui di un milion di visitadôrs (intal ultin periodi une media di 7.100 in dì) e 1011 aziendis che a àn vude la pussibilitât di presentâsi al public internazionâl e di inviâ contats comerciâi cun clients di marcjâts impuartants – ancje gnûfs, tant che Messic, golf Persic e Israêl – e cun grandis corporazions. A turni, lis regjons slovenis a àn vude la ocasion di presentâ lis propriis particolaritâts e atrazions turistichis a un numar simpri cressint di visitadôrs. La partecipazion slovene ae Expo 2015 di Milan e je stade duncje cence dubi un sucès e e à passât ancje lis spietis plui otimistichis de vilie.
I CONTIGNÛTS_La Slovenie si è presentade ae esposizion universâl cul sproc «I Feel Slovenie. Verde. Ative. Sane.» I contignûts principâi, preseâts pal mût interatîf che a son stâts presentâts al public, cirint di stimolâ ducj i cinc sens, a son stâts il sâl (cu la pussibilitât di cjaminâ sul famôs sâl di Piran), lis âfs (cun diviers i gjenars di mîl di nasâ), lis aghis termâls e minerâls, l’escursionisim e il cicloturisim e lis tecnologjiis verdis. Cun di plui, a son stadis disfrutadis pe promozion dal Paîs ancje ecelencis za afermadis a nivel internazionâl tant che i schîs Elan, i avions Pipistrel e la Postojnska jama.
La marche I feel sLOVEnia, visibile su dutis dôs lis bandis dal paveon e promovude ancje cun adesîfs a forme di cûr distribuîts al public, e va fûr de Expo rinfuarçade e cuntune ricognossibilitât plui largje.
UN DI CHEI plui VIVARÔS_Il paveon Slovenie al è stât, ancje daûr dal Corriere della Sera che lu à cjapât dentri inte sô top 4, un di chei plui vivarôs e cuntune animazion tant apassionante. A riprove di dut chest, ancje la sielte di dâ di fâ propit al paveon sloven lis premiazions e la fieste di sierade dal campionât mondiâl di balon di taule de expo, che a àn partecipât 64 formazions. Secont un scandai resint fat de agjenzie Mediana suntun campion di 326 personis, il 95% dai intervistâts al à conseât la visite dal paveon sloven a amîs e parincj, e cuasi l’86% al à decidût di lâ a visitâ la Slovenie. La plui part dai visitadôrs dal paveon sloven (80%) a son talians, cun daûr i francês. La famose “kremšnita“ (paste di creme) di Bled e je stade sielte cun di plui tra i 10 dolçs “di no pierdi“ ae esposizion universâl.
UNE IDEE BUINE_Secont lis principâls aziendis slovenis che a àn partecipât ae esposizion universâl par slargjâ il propri target, il Business Center che al opere intal ambit dal paveon sloven (une intuizion dal ministri pal disvilup economic Zdravko Počivalšek) al è risultât tant util. Al stes numar di contats cun esponents dal setôr economic e clients potenziâi di dutis lis parts dal mont si sarès rivâts, cence la Expo, in doi agns e a un cost tant plui alt. La aziende Lina Design (mobilie, cjadreis, taulis), par esempli, che e furnìs i propris prodots ancje a marchis talianis tant che Natuzzi, e à convinçût tancj paveons a doprâ i siei prodots e e à inviât contats che a podaressin puartâ a colaborazions a lunc tiermin, cun Sky Tv e Birra Moretti.
VIERS IL FUTÛR_Dopo la sodisfazion par vê fat un lavôr otim dal pont di viste dal marketing e de promozion turistiche e economiche, il voli al è cumò za orientât al futûr. Pe fin di Otubar si spiete la decision dal guvier su la partecipazion ae Expo 2017 in Kazakistan (diviers a augurin une presentazion de Slovenie in colaborazion cu la vicine Cravuazie), ma si pense za ancje al 2020, ae Expo di Dubai intai Emirâts Araps. ❚
Tjaša Gruden

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +