Sfuei Mensîl Furlan Indipendent
Archivi de Patrie

SLOVENIE. Elezions europeanis: la situazion slovene

............

Al mancje pôc aromai ai 25 di Mai, e duncje aes elezions pal rinovament dal Parlament european, lis tiercis li che e cjape part ancje la Slovenie. Jentrade uficialmentri inte Union Europeane il prin di Mai dal 2004 – dopo che tal referendum dai 23 di Març dal 2003 la jentrade inte UE e je stade sostignude dal 89,64% dai votants – la Slovenie e à elet pe prime volte i siei rapresentants intal parlament european ai 13 di Jugn dal 2004. La afluence al vôt e je stade chê volte dal 28,35%. Cuasi identiche la percentuâl dai votants che e je lade ai seçs cinc agns plui tart: 28,37%. Daûr dai prins scandais, ancje chest an e je previodude une afluence tor dal 30%, segn che lis istituzions europeanis a van indevant a aparî lontanis dai citadins slovens, cheste volte forsit ancje par vie che a son stracs des politichis dal rigôr e dal sparagn imponudis di Brussel. L’interès dai partîts, soredut di chei gnûfs o di chei che no àn propris rapresentants intal Parlament nazionâl, al è invezit cetant alt. Cui che al rive di fat a elei un propri candidât intal Parlament european, al ven calcolât intes campagnis eletorâls ae fate dai partîts parlamentârs slovens. Cun di plui, la prossime Sierade in Slovenie a son in program lis elezions aministrativis.
Fin al 2009, la Slovenie  e veve dirit a siet seçs, ma dopo la jentrade in vore dal Tratât di Lisbone a son deventâts vot. I prins europarlamentârs slovens a son stâts Mihael Brejc, Romana Jordan Cizelj, Ljudmila Novak (leader di Nsi e za ministri pai slovens fûr dai confins e intal mont), Alojz Peterle, Mojca Drčar Murko, Jelko Kacin e il president sloven di cumò Borut Pahor, che il so puest al è stât cjapât tal Novembar dal 2008 di Aurelio Juri. Intal ultin mandât, la Slovenie e jere rapresentade di Milan Zver, Zoran Thaler, che si è dimetût intal 2011 par vie dal so coinvolziment intun scandul par coruzion e al è stât cjapât il so puest di Mojca Kleva, Alojz Peterle, Jelko Kacin, Ivo Vajgl, Tanja Fajon, Romana Jordan Cizelj e Zofija Mazej Kukovič (dal Dicembar 2011, cuant che la Slovenie e à otignût il dirit al otâf seç).
Tal moment che o scrivìn, a dôs setemanis dal tiermin pe presentazion des candidaturis, lis listis a somein aromai definidis. Kacin (LDS) e Peterle a intindin cori pal tierç mandât; a volaressin tornâsi a candidâ ancje Tanja Fajon e Mojca Kleva (il lôr partît SD – di centriçampe – ancjemò nol à comunicade la liste dai candidâts), intant che a ciraran dal sigûr la conferme ancje Ivo Vajgl (sostignût dal partît e de associazion dai pensionâts) e Milan Zver. Chest ultin al sarà, tant che cinc agns indaûr, prin de liste SDS (partît democratic sloven, dal cjamp di centridiestre) di Janez Janša. Tra i candidâts inte liste SDS al è ancje un rapresentant dai slovens dal Friûl Vignesie Julie: Damijan Terpin, segretari regjonâl de Slovenska skupnost (Union slovene), che al è  ancje il responsabil par cont di SDS dai slovens fûr dai confins e intal mont. Invezit, in Italie la Slovenska skupnost e à strenzût la aleance cul Sud Tiroler Volks Partei (Svp), e in chê liste e  corarà Tanja Peric. Ma i rapresentants de Slovenska skupnost no saran i unics membris de comunitât slovene in Friûl Vignesie Julie a cori par un seç intal parlament european. Il partît Solidarnost (cun prin de liste Dušan Keber, za ministri de salût) al met di fat in liste ancje il storic Jože Pirjevec. La Liste Virant e varès di candidâ il ministri pe justizie Senko Pličagnsč.
Tra i candidâts invezit nol sarà dal sigûr il Comissari european pal ambient Janez Potocˇnik che al à za mandât indaûr l’invît di Pozitivna Slovenija. Il partît de prime ministre Alenka Bratušek, che al cîr un acuardi eletorâl cun LDS e Zares, al propon tant che candidât di ponte Jože Mencinger. Nova Slovenija e il partît popolâr SLS a àn definît za la proprie liste che i fasarà di sburt Peterle. Tra i candidâts ancje i doi leader di partît, Ljudmila Novak e Franc Bogovič, che a son al moment, in plui di Igor Lukšič (SD), ancje i unics presidents dai partîts parlamentârs che a àn decidût di partecipâ aes europeanis.
Pe prime volte e parteciparà aes elezions la formazion Združena levica (Çampe unide), che e condivît lis posizions dal leader grêc di Syriza Alexis Tsipras. Al podarès cori par un puest in parlament ancje l’ex president de Cort dai conts Igor Šoltes, sostignût di cualchi organizazion de societât civîl. ❚
Tjaša Gruden

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +