La vacine e continue a jessi un teme tant cjalt in Italie, dulà che e je di timp motîf di discussions ancje tant infogadis tra sostignidôrs e aversaris di cheste misure preventive. Ancje in Slovenie a son in cressi i contraris aes vacinis, che lis calcolin nocivis, e la cuviertidure cuintri lis malatiis infetivis e je in câl.
La Organizazion Mondiâl de Sanitât e fisse al 90-95% il soiâr di sigurece minime pe cuviertidure des vacinis: disot di chest soiâr, i agjents patogjens a continuin a circolâ, intant che une cuviertidure di vacinis adeguade e garantìs la imunitât coletive, ven a stâi a vegnin protets ancje chei che par motîfs di salût no puedin jessi vacinâts e i singui che su chei la vacine no à vût sucès (a son câs tant rârs). In Italie, ae cuviertidure dal 95% no si rive par nissune des vacinis monitoradis dal Istitût superiôr di Sanitât, intant che in Slovenie la cuviertidure des vacinis dai fruts, par ce che al tocje chês obligatoriis, e je daûr a calâ di un pont percentuâl ad an.
La cuviertidure plui basse si regjistre inte zone di Lubiane, dulà che par esempli intal 2015, la imunizazion cuintri il varuscli, il mâl dal botaç e la rosolie no rivave al 90 par cent, che al vûl dî che no je plui garantide la imunitât coletive. Par ce che al tocje lis vacinis dai adults, la cuviertidure cuintri cualchi malatie in Slovenie e je plui basse a pet di tancj altris paîs europeans. Par esempli, ancje se la Slovenie si coloche tra i paîs endemics cu la presince plui alte di meningoencefalite di cecje, la percentuâl di vacinâts e je cetant basse. Compagn al vâl pe influence stagjonâl, dulà che lis personis di etât superiôr ai 65 agns che a decidin di vacinâsi a passin di pôc il 10%, une percentuâl che e coloche la Slovenie lontane dai obietîfs fissâts de Organizazion Mondiâl de Sanitât (almancul il 75 par cent). In Slovenie, lis vacinis a son regolamentadis de leç su lis malatiis infetivis, aprovade intal 1995 e po dopo modificade e inzornade (ancje se l’oblic al jere in ûs di diviers decenis). Tal Istitût nazionâl di sanitât publiche e je ative une Comission consultive pes vacinis (National advisory committee on immunization) formade di esperts, che e furnìs conseis su lis prioritâts intai setôrs de coordenazion des vacinis, des decisions strategjichis su lis malatiis infetivis di prevignî cu lis vacinis, e de definizion dal program di vacine.
Il program di vacine, daûr de propueste dal Istitût, al ven dopo aprovât an par an dal ministri de sanitât. Il program anuâl pal 2017 al è stât publicât in Jugn e al previôt siet programs di azion cuintri lis malatiis infetivis: pai fruts in etât prescolastiche, par arlêfs e students, pai lavoradôrs (su la base dal gjenar di implei), pal rest de popolazion, pai viazadôrs internazionâi, pe tutele cu lis medisinis e pes vacinis, e la tutele cu lis medisinis in câs di dibisugne. Par ce che al tocje lis vacinis pai fruts di etât prescolastiche e scolastiche, a son obligatoriis (di fâ in periodis diviers o di ripeti plui voltis) lis vacinis cuintri difterite, tetan, pertòs, Haemophilus influenzae di gjenar b (Hib), poliomielite, varuscli, mâl dal botaç e rosolie, epatite B e, pai students, ancje cuintri rabie e meningoencefalite di cecje. Previodude (ma no obligatorie) ancje la vacine cuintri lis infezions pneumococichis, e pes frutis, cuintri il papilloma virus uman. In câs particolârs, si fasin ancje vacinis cuintri altris malatiis.❚
Tjaša Gruden