Tal Avrîl dal 1990 lis primis elezions democratichis e la nassite dal prin guvier cun plui partîts, vuidât dal democristian Lojze Peterle
Bielzà tal mês di Avrîl la democrazie in Slovenie e à fat 30 agns. Ai 8 di Avrîl dal 1990, i slovens a votarin te suaze des primis elezions cun plui partîts, che a forin une sconfite pai comuniscj. Daspò sedi la Slovenie che dute la Jugoslavie a tacarin une strade che no si tornave plui indaûr.
◆ Daspò de muart di Tito tal 1980, i problemis a nivel politic, economic e struturâl de Jugoslavie a tacarin a jessi simpri plui evidents e a flapî il spirt di union che al veve tignût adun ducj i popui dentri de Republiche socialiste federâl di Jugoslavie. Te societât e te politiche, planc a planc a saltarin fûr spazis par tacâ a fevelâ di partignince etniche e di democrazie.
Slovenie (e Cravuazie) a domandavin plui autonomie, ma dentri de Republiche di Jugoslavie al jere cui che al dave cuintri a cheste domande. Soredut il centralist Slobodan Miloševic´ che, tal 1986, al jere deventât president de Leghe dai comuniscj serps, e tal 1989 president de Serbie. Cuntune ande simpri plui nazionaliste, la sô politiche tal Cossovo e a pet dal Vojvodina e dal Montenegro, e mostrave di volê simpri plui centralisim a Belgrât e simpri mancul autonomiis.
◆ A judâ i sburts a dividisi, al jere dal sigûr ancje che il nivel di vite in Slovenie e te zone setentrionâl de Jugoslavie al jere miôr di chel tes zonis meridionâls. Ma soredut, la crisi economiche de Jugoslavie, cuntun debit forest cetant alt, tante int cence lavôr e inflazion tor dal 120%.
◆ Ai 22 di Zenâr dal 1990 dute la delegazion dai comuniscj slovens e bandonà il XIV congrès de Leghe dai comuniscj de Jugoslavie par proteste cuintri dal ostruzionisim dai delegâts serps, che a davin cuintri a dutis lis propuestis slovenis a pro di leams mancul strents tra lis Republichis. Pôc plui tart a faserin compagn la delegazion cravuate, chê bosgnache e chê macedone.
◆ Ma un gnûf percors te societât de Slovenie al jere tacât bielzà ae fin dai agns Otante. Tal 1988 si jere rivâts a protestâ cuintri dal esercit jugoslâf e a fâ nassi i prins partîts. Tal 1989, la Slovenie e veve cambiât la sô costituzion metint dentri il dirit dal popul sloven di autodeterminâsi e scancelant il rûl di vuide dal partît comunist, vierzint la strade a un sisteme cun plui partîts. Ai 8 di Avrîl dal 1990, come bielzà scrit parsore, in Slovenie a forin lis primis elezions democratichis.
◆ Cul 54,8% dai vôts e vincè la coalizion Demos, che e meteve adun la oposizion democratiche de Slovenie. Ancje se e fo la liste plui votade, la Leghe dai comuniscj slovens e pierdè. Ai 16 di Avrîl si insedià il prin guvier cun plui partîts in Slovenie, cul democristian Lojze Peterle tant che prin ministri. Tal percors che al puartà ae democrazie in Slovenie, al fo impuartant ancje il rûl di Janez Janša, che tal guvier di Peterle al fo ministri de Difese e che di cualchi mês al è il gnûf prin ministri de Republiche di Slovenie.
A deventâ president de Republiche di Slovenie al fo, invezit, Milan Kucˇan, che ai 22 di Zenâr dal 1990 al jere un dai 120 delegâts che a vevin lassât il XIV congrès de Leghe dai comuniscj de Jugoslavie. Tant che tra i prins a promovi la democratizazion e pal so lustri personâl, al vincè cuintri dal candidât di Demos, Jože Pucˇnik, cul 58,59% dai vôts. ❚