Sfuei Mensîl Furlan Indipendent
Archivi de Patrie

SLOVENIE. 10 agns in EU e l’euroseticisim al rive ancje a Lubiane

............

Il Prin di Mai, fieste tradizionâl dal lavôr, intal 2004 in Slovenie, ma ancje inte nestre fasse confinarie, al à acuisît un gnûf significât. In chê dì, di fat, la Union Europeane e à scomençât il propri slargjament bande l’Est e tra i gnûfs paîs membris – prime tra lis republichis de ex Jugoslavie – e jere la Slovenie. Cu la jentrade inte Union europeane (dopo une lungje tratative tacade intal 1998, intardade soredut des cundizions ponudis de Italie) la Slovenie e je rivade a chel che al è stât un dai siei obietîfs fondamentâi strategjics fin de proclamazion de indipendence.
Lis spietis par un futûr miôr a jerin duncje enormis, cemût che al dimostre il risultât dal referendum dal 2003, là che la jentrade inte UE e à vût une poie cuasi plebissitarie (plui o mancul il 90% di assintiments). Dîs agns dopo invezit, complice la crisi economiche, ancje in Slovenie i eurosetics a son in cressi e a fevelin di sperancis delududis e di ocasions disfrutadis mâl. Cun dut achel, daûr dai dâts publicâts il Març passât de Eurostat sul grât di sodisfazion pe cualitât de vite dai citadins dai paîs membris de UE, i slovens si son dits in medie sodisfats (vôt medi 7, suntune scjale di 1 a 10). Tra i ponts di fuarce  de UE, i slovens a àn listât soredut la sô potence economiche, industriâl e comerciâl, i bogns rapuarts fra i paîs membris e il standard di vite dai citadins. Tra lis sfidis pal futûr de Union Europeane i intervistâts a àn segnât la disocupazion, la disavualance sociâl e une cressite economiche insuficiente.
Ma cierts parametris economics relatîfs ae Slovenie a son cambiâts cetant intai ultins dîs agns (font Eurostat). Lis importazions a son cuasi dopleadis. Il debit public al è lât sù dal 27,3% al 71,7%, il tas di disocupazion dal 6,3% al 10,1%. Il podê di acuist, esprimût in Pil pro capite in rapuart ae medie UE,  al jere al 87%, intant che cumò al è stabil al 84%. Al va sotlineât cemût che i dâts a sedin lâts in piês però dome dopo il sclop de crisi economiche che e à assaltât i Paîs ocidentâi. Intal 2008 di fat, il tas di disocupazion al jere dal 4,4%, intant che il debit public al jere lât jù fin al 22,1% dal Pil. Tindince similâr ancje par ce che al tocje il prodot interni sporc, cressût intai prins cuatri agns dal 20% e calât dal 2008 incà dal 10%. L’aument efetîf dal Pil intai dîs agns de jentrade inte Ue al è risultât duncje dal 10%.
Su la fonde dai dâts dal Umar (Ufici pes ricercjis e analisis macroeconomichis), de jentrade inte Union Europeane a son cressudis ancje lis paiis mediis al sporc cjapadis di lavoradôrs slovens. Intal 2005, il compens mensîl medi sporc al jere di 1.157 euros, intant che l’an passât al jere di 1.523 euros. Il valôr massim al è stât intal 2012 (1.526), ma dal 2011, cuant che la medie anuâl e à passât pe prime volte i 1.500 euros, il valôr si manten scuasi stabil. Il vuadagn net anuâl, secont fonts Eurostat, al è lât sù invezit dai 7.236 euros dal 2004 ai 10.222 euros dal 2013.
Nol è coret duncje individuâ te jentrade inte Ue la cause dai problemis economics de Slovenie. Ancje se cumò, insiemi cun Grecie e Cipri, e je tra i paîs de UE cu la cressite economiche plui basse. La Slovenie si jere fate cjatâ pronte plui di chei altris paîs a est di chê che e je stade la coltrine di fier ae jentrade inte famee europeane. Ma in chescj dîs agns no à savût risolvi i propris problemis economics struturâi. Cussì, ai prins agns li che, in graciis di une circostance favorevule, al è stât un vêr bum economic – che, par altri, al à contribuît a cressi lis spietis dai citadins-, al è vignût daûr un lunc periodi di crisi che al à puartât il Paîs al pericul di default. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +