SIUMS DI STORIE. Socialistična Republika Furlanija

La rubriche storiche e continue ma cuntune variazion: cemût saressie stade la storie dal Friûl se no fos lade come che invezit e je lade te realtât? Noaltris o provìn a rispuindi cussì…
***
Cemût che e je lade
Finide la ultime vuere, la Europe e je stade dividude in doi blocs separâts di une “tendine di fier”, che di Danziche e vignive jù fin a Triest. Di une bande la societât Ocidentâl, capitalistiche, sot lis grifis americanis, platadis daûr dal teatrut di une libertât fate pluitost di libar marcjât, di ande consumiste e di tantis falopis che dome intai ultins agns e son vignudis fûr. Come lis operazions de CIA che – tal massim segret – propit achì, inte nestre Patrie, cul jutori di cualchi politicant ben inmaneât a Rome, a proviodevin che il Friûl al deventàs un dai confins plui armâts e sogjets ae servitût militâr dal mont. Di chê altre bande, invezit, al regnave il socialisim reâl, il Pat di Varsavie e chel ruspiôs di un ors rus che ogni tant si sustave cuintri cualchidun e al mandave i cjars armâts a invadi mo Budapest, mo Praghe. Tal mieç, cuntune cierte braùre, la Jugoslavie dal maressial Tito, che e veve miôr clamâsi fûr dal braç di fier zuiât di Moscje e di Washington. Tito, al  preferive jessi no inlineât, e si è inventât cussì chê “tierce vie” che lu parave di ducj e tal stes timp lu faseve ancje jessi une vore suspiet ai voi di ducj chei altris. Ma in cheste complicade situazion, il nestri Friûl al è stât striçât par tancj agns intune posizion politiche internazionâl une vore delicade, al centri di une cuistion mondiâl là che i grancj interès di dutis lis plui grandis fuarcis si intorteavin un parsore di chel altri. E jere clare a ducj la impuartance strategjiche dal nestri teritori, di simpri cûr gjeografic e culturâl de Europe ladine, slave e todescje: une puarte vierte in ogni direzion. No bisugne dismenteâsi duncje che chi di nô, propit par chestis resons, la situazion e je restade une vore fluide e pericolose dal 1945 fin al 1975, vierte e dibatude par trente agns, cuant che cul famôs Tratât di Osimo si decidevin, une volte par dutis, i confins di cumò. Si dîs che il stes Tito, plui di une volte, al varès sostignût che la tiere furlane e veve di deventâ une republiche jugoslave fin al confin naturâl dal Tiliment. Muart Tito, finide la Storie.
***
Cemût che e podeve lâ
Tal 1991, Udin, Lubiane e Zagabrie a domandin la autonomie di Belgrât. Une bataie incredibile, che pal Friûl e pe Slovenie si risolf – tant che si sa – in curt e in maniere cuasi dal dut pacifiche, a part cualchi sclopetade di avertiment. Diferente la cuistion cravuate, che par motîfs di spazi no podìn tratâle cumò. A jerin bielzà tancj agns che la Republiche Socialiste dal Friûl, anetude ae Republiche Federâl di Jugoslavie tal 1945, si ispirave a un fuart sburt autonomist, judade in chest di une organizazion capilâr clandestine che si fondave nuie mancul che su la antighe lidrîs de Glesie di Acuilee, e che in cuasi cincuante agns di regjim socialist e veve inmaneade une rêt incredibile, che di Lubiane si sparniçave jù fin a Skopije in Macedonie, cjatant un fuart jutori ancje dai patriarcjâts ortodòs, par vie di une storie milenarie in comun. Come che si sa fin de scuele primarie, i bataions partigjans dal Novesim Corpus dal maressial Tito, tal 1945, dutune cu lis bandis slovenis dal Triglav e chês furlanis de Garibaldi, a vevin liberade la Patrie – come che ancjemò le clamin i furlans – dai fassiscj. Cheste lote coragjose e fuartone e veve permetût al Maressial di pretindi la anession. Cussì il Friûl al deventà la setime republiche jugoslave. Belgrât al veve prometût che al varès tutelade la culture e la lenghe identitarie furlane, come che al à fat cul albanês in Cossovo e in Macedonie, cul istrovenit in Istrie e in Dalmazie e cul ongjarês de regjon dal Mura. Clarementri, intun regjim bilengâl in maniere perfete, tant tes scuelis che pai documents e i nons dai pais: fintremai al 1991, tai cartei stradâi si podeve lei Videm/Udin, Tujec/Tumieç, Gumin/Glemone, Sdaniel/Sant Denêl e vie indenant. Une fortune che ai fradis furlans restâts in Italie – chei di là da la Aghe – purtrop no ur è tocjade, viodût che a stan in dì di vuê ancjemò scombatint cul stât centrâl di Rome par svindicâ chest dirit naturâl dal om, ven a stâi chel di podê fevelâ la sô lenghe mari cence pôre che jal impedissin. I furlans però, popul babio e inteligjent, difident par nature e suspietôs par esperience, no si saressin mai plui e mai altri fidâts dal dut, cussì, sore nuie. A volevin une prove di amicizie une vore fuarte de bande dal guvier centrâl di Belgrât, par jessi convints dal dut che la anession Jugoslave e podeve jessi un afaron rispiet al destin talian. Prove che e je rivade dome tal 1954, cuant che cu la firme dal famôs Memorandum di Londre, siglât ai 5 di Otubar insiemi cui Inglês e cui Americans, Triest al passave in maniere definitive in Italie, cun grandissime sodisfazion di dutis lis capitâls de Republiche Federative e, massime, di Videm/Udin. Dome cumò, a plui di vincj agns de autonomie de Republiche Furlane – di dîs agns incà jentrade cun ducj i titui in Europe – cu la viertidure dai archivis segrets, si sta delineant une veretât sflandorose: ven a stâi che chest regâl al fo imprometût in grant segret di Tito nuie mancul che ai sorestants de organizazion popolâr identitarie furlane, vignûts al scuviert propit par contratâ cheste anession, in cambi di une garanzie che no varessin mai vude dal stât talian. Lis cjartis a fevelin di un ciert “Prekek Placjrian” che, insiemi cun “Josip Markettich”, al varès scombatût par un risultât cetant impuartant. I storics dal dì di vuê a son convints di rivâ une dì a cjatà fûr ancje il lôr non furlan, prime o dopo. A disin che al baste sgarfâ ben tes cjartis platadis tes cartelis. Une operazion che nus pâr destinade a vê un sucès garantît. ❚
Angelo Floramo