FRIÛL EUROPE. Il PE al sburte, la Comission e frene e la Catalogne e reste une esempli

Ai 11 di Setembar stâts il Parlament European (PE) al à fate buine une gnove risoluzion pe garanzie dai dirits linguistics e pe promozion des lenghis minoritariis. La propueste, fate indevant de bande dal eurodeputât cors François Alfonsi (Aleance Libare Europeane – Verts), e je passade cun 645 vôts a pro, 26 cuintri e 29 astensions.
Il document al palese la impuartance politiche, culturâl e socioeconomiche de diversitât linguistiche e de tutele des minorancis pe Europe e al sburte sei chei altris orghins de UE che i guviers dai Stâts a fâ cuintri aes pratichis di discriminazion linguistiche e di assimilazion e a meti in vore azions strategjichis che a tocjin istruzion, media, vite publiche e politichis culturâls. Ai Stâts ur ven dade ancje une stiçade par che a ratifichin la Cjarte europeane des lenghis regjonâls o minoritariis, se no lu à ancjemò fat, intant che ae Comission i ven domandât di vierzi une linie di finanziament european specifiche par sapontâ l’ûs, l’insegnament e la difusion des lenghis mancul dopradis. Il dut al va daûr di chês altris cjoltis di posizion dal PE in cont di lenghis e dirits, di iniziativis similârs cjapadis sù de bande di altris istituzions tant che Unesco e Consei de Europe e soredut di diviersis previsions dal Tratât di Lisbone e dai articui 21 e 22 de Cjarte dai dirits di fonde de UE.
Chei stes riferiments si cjatin inte «iniziative dai citadins» a pro des minorancis, fate indenant tai mês passâts de bande de Union federaliste des nazionalitât de Europe (FUEN). Doi dîs dopo dal vôt dal PE la Comission e à metût in discussion propit lis fondis juridichis di chê sorte di “propueste di leç popolâr”. I vertiçs de FUEN a contestin chê decision e a pensin di fâ ricors.
Intant che il PE al votave, ai 11 di Setembar, i catalans a jerin in place pe fieste nazionâl e pe “Via catalana”, une cjadene umane a pro de indipendence di passe 400 chilometris e di un milion e 600 di lôr, che e à vût un impat planetari, sul plan politic e su chel mediatic.
A Rome al è stât cui che al à cirût di montâ sù su la onde catalane metintsi intor une maiute cu la “estelada”. La sfilade dai parlamentârs leghiscj no ur à plasût par nuie ae Assemblea Nacional Catalana (ANC) che e à dât fûr une note marcant di cjatâsi de bande opueste rispiet a chel partît talian. I catalans si confermin un esempli pal Friûl. ❚
✒ Marco Stolfo