Sfuei Mensîl Furlan Indipendent
Archivi de Patrie

AUSTRIE. Ducj a vuelin i vôts dai migrants

............

Daûr la statistiche, cirche 534.000 eletôrs potenziâi a àn lidrîs di fûr da la Austrie. Vâl a dî, il 8,6% dal eletorât austriac.
Nol è di maraveâsi se duncje ducj i partîts parlamentârs a cirin di clamâ dongje chest grup di eletôrs tes lôr campagnis. Tal passât lu vevin fat dome i partîts di çampe, soredut i Verts. Cumò, viodût che chest grup al cres di un continui, nissun partît lu pues lassâ fûr. In contrast cu la Gjermanie, il numar dai politics di origjin foreste al è ancjemò piçul. Paraltri, probabilmentri te prossime legjislature, pe prime volte in trê frazions o viodarìn in ogni frazion almancul un deputât cun lidrîs forestis. Atualmentri, l’unic politic pardabon potent cuntune storie migratorie e je Maria Vassilakou, nassude tal 1969 a Atene: dai 25 di Novembar dal 2010 e je vice sindic di Viene. Daspò il ritîr di Madeleine Petrovic Vassilakou, e fo elete tal 2008 ancje vice presidente dai Verts. Ancje chest nus mostre che la Austrie idiliache, cun monts cuviertis di nêf e vacjis contentis, e je deventade za un paîs multiculturâl, dulà che tes citâts o vin une percentuâl di origjin foreste sore dal 20%, duncje un numar une vore plui alt in confront cu la Italie.
Coordenadôr pes comunitâts di imigrâts
Particolarmentri atîf tes comunitâts di imigrâts al è il partît socialdemocratic. A àn nomenât il turc di nassite Resul Ekrem Gönültas¸ tant che coordenadôr de campagne tes comunitâts di imigrâts. Gönültas¸ e il so team a visitin lis associazions e a van ai events tes comunitâts di imigrâts, che a sedin araps, turcs, serps, cravuats o altris. Il materiâl publicitari al è fat par clamâ i grups di migrants – che fin cumò no àn mostrât un interès pe politiche austriache – esclusivementri intes lôr lenghis, soredut par turc e par serp cravuat. In struc, i socialdemocratics a àn dome cuatri candidâts di origjin imigrade te top 100, e chei no si cjatìn intai prins puescj.
Musulman in parlament pe prime volte pal partît popolâr
Pe prime volte, un musulman al rapresente tal parlament i interès dal partît tradizionalmentri cristian. Asdin El Habbassi, cun lidrîs in Maroc, za a cjâf de organizazion dai zovins te ÖVP a Salisburc, si cjate su la liste federâl al cuint puest. Un puest sigûr par jentrâ ancje tal parlament. I popolârs però, une campagne proprie, come che le àn fate i socialdemocratics pai imigrâts, no le vuelin fâ.
Aleance cui nazionaliscj serps
Par capî trop impuartants che a son i vôts dai migrants, si à di notâ che ancje la diestre estreme – dispès ancje chê xenofobe tant che FPOE – e cîr di otignî i vôts dai serps, il plui grant grup di origjin foreste in Austrie. Tai serps, a pensin di cjatâ un aleât soredut te lôr disposizion anti islamiche. Il leader dal partît Strache, al à fat ancje une aleance cul partît nazionalist serp SNS. »La Serbie e dovarès jessi part de Europe e contribuî a screâ une Europe federâl des nazions«, al à sotliniât Strache intune conference stampe cun Tomislav Nikoli, leader dal partît serp e ex vicepremier de Republiche Jugoslave.
Cun dut achel, la cuistion eletorâl centrâl dal partît liberâl e je ancjemò la cuistion dai stranîrs, dulà che a incolpin il guvier di coalizion pal faliment de politiche di integrazion.
»Viene no dovarès deventâ Berlin, dulà che la polizie todescje no je plui buine di garantî l’ordin tai cuartîrs abitâts soredut di turcs e araps«, al sosten il sucessôr di Haider.
I Verts: doi puescj pai candidâts di origjin turche
E je turche di origjin, la esperte e puartevôs pai dirits umans e pe integrazion Alev Korun, nassude 1969 a Ankara e za deputât dal 2008. Cumò pai Verts, al parlament nazionâl, salacor a stan daûr cun cualchi sperance Aygül Berivan Aslan e Efgani Dönmez.
Opuscui informatîfs in cinc lenghis
Dut câs, i eletôrs potenziâi dai Verts no varan problemis linguistics. I opuscui informatîfs a son disponibii in cinc lenghis. Strani dome, in chest contest, che la lôr pagjine web uficiâl e sedi fûr par fûr par todesc. Nancje su la pagjine dai Verts in Carinzie no cjatìn la lenghe slovene; dome su la pagjine di Burgenland o vin une piçule presentazion dal partît intes lenghis di minorance, ven a stâi cravuat, ongjarês e rom.
In struc, o podìn dî che i timps a son cambiâts dopo plui di 40 agns di imigrazion. Dome tai ultins agns, o regjistrìn i prins politics cun lidrîs forestis tal parlament nazionâl. No je dome colpe de politiche austriache, ma ancje dai imigrâts stes che la plui part di lôr par agns no à mostrât masse interès , cjalant invezit di plui viers chel che al sucedeve te lôr viere patrie. ❚
✒ Janez Erat

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +