Sfuei Mensîl Furlan Indipendent
Archivi de Patrie

«Si à di tornâ a fâ vivi il sens di comunitât dai furlans che al jere une volte»

Dree Venier

Interviste a Erika Furlani, sindiche di Cjampfuarmit
Biadelore o rivi a intervistâ une femine par cheste rubriche sui sindics che a fasin part de ACLiF- Assemblee de Comunitât Linguistiche Furlane. O tachi cuntune amie, e duncje vie pe interviste o doprarai il “tu” pe sindiche di Cjampfuarmit, Erika Furlani. Fra l’altri, Erika e je “lade sù” sot dai colôrs di un partît furlanist, Patrie Furlane, duncje o soi particolarmentri curiôs di savê ce che e pense de Assemblee.
__
Erika, Cjampfuarmit cuant isal jentrât te ACLiF?
O ai vût di lâ a viodi: o sin jentrâts cuant che e jere la aministrazion di prime, ma o ai di dî che di conseire di oposizion in pratiche no le ai mai sintude nomenâ di lôr. Pense che o crodevi scuasit che o fossin stâts nô a fâ buine la partecipazion. Tant par dî che si pues jessi dentri in plui manieris…
__
E cumò che tu sês tu? La Assemblee si “sintie”? Ce rapuarts âstu cun jê tant che aministradore?
Jo o ai delegât il nestri conseîr Oscar Olivo a lâ aes assembleis, ma dut câs o soi simpri informade di dut, o seguìs lis comunicazions che e fâs e mi sint cul president Maurmair. E je une istituzion presinte e ative, nuie ce dî, e che e à la nestre plene atenzion e disponibilitât ae colaborazion.
__
Cemût ti cjatistu a jessi sindiche che e fâs part a un partît furlanist? Tu sês, magari cussì no, une moscje blancje. Ce rapuart âstu cui sindics leâts ai partîts talians?
I rapuarts a son normâi e di colaborazion, no mi sint “disvantazade” parcè che no fâs part dal sisteme dai partîts talians. Duncje disìn che si pues trancuilementri jessi sindic ancje cence apartignincis ai partîts di Rome o Milan: o podaressin jessi di plui! (e rît, ndr)
__
E come femine, âstu vût cualchi dificoltât o difidence in merit al rûl di sindic? E ti fâstu clamâ sindic o sindiche/sindichesse?
Cjale, pal fat des terminologjiis jo no bacili tant. Al è di une vite che o soi “inzegnîr” (si è laureade in inzegnarie a Udin, ndr) che al è un tiermin masculin, ma par me a son tiermins tecnics, neutris. Il rispiet e la paritât si vuadagnin in altre maniere, fasint ben il to lavôr. E o ai di dî che tant che sindic, jo no ai di contâ nissun episodi li che mi soi sintude discriminade o considerade di mancul par vie che o soi femine.
__
Jessint tu braurose di partignî al nestri popul cence platâti daûr di un partît “forest”, secont te ce varessie di fâ la ACLiF par sburtâ chest sens di apartignince al Friûl?
Par me e à di fâsi sintî di plui a nivel di comunicazion. Fâ sintî che al esist un orghin istituzionâl che al fâs riferiment al teritori dal Friûl, che al prudele e che al sosten la lenghe furlane. Chest par recuperâ il sens di comunitât che si sta smamint e che al è simpri stât une carateristiche dai furlans. Cence chest sens di comunitât no varessin podût frontâ il taramot come che lu vin frontât, par fâ un esempli. Cumò si sta sparniçant masse une sorte di egoisim e di individualisim sterp che o vin di fâ di dut par superâlu.
__
La Assemblee podaressie jessi un element par belançâ i ecuilibris saltâts cu la riforme dai ents locâi e che a somein favorî dome Triest?
Intun ciert sens sì, ma no tant cuntun rûl decisionâl in cjamp politic o economic, dal moment. Jo le viôt cuntun rûl plui culturâl, di incressi la cussience dai furlans come che si diseve prime. Insome, rivâ intant a fâ capî di metisi insiemi, dopo ancje il rest al podarà vignî, ma dopo, dome se si rive a sburtâ un biel sens di unitât dal Friûl.
__
A proposit di culture e di lenghe furlane, cemût sêso cu la comunicazion par furlan, par esempli cu la cartelonistiche? E vêso fat bon il Plan speciâl di politiche linguistiche (PSPL)?
Propit cumò o stin fasint une gnove cartelonistiche e o vin za ordenât i cartei, che clarementri a son bilengâi, fats cu la consulence de ARLeF. O doprìn il furlan a pene che o vin la ocasion, par esempli pe iniziative “Fvg in movimento. 10mila passi di salute” realizade di Federsanità Anci FVG. E ven di chel che al dîs la Organizazion Mondiâl de Sanitât, ven a stâi che al bisugnarès fâ 10.000 pas in dì, che al fâs ben a cuarp e spirt. La Regjon e à a pene prontât 59 percors fûr par 70 Comuns, e in chel dal nestri comun o vin fat meti dutis lis indicazions par furlan, talian e inglês. Il Pspl, invezit, no lu vin fat bon parcè che o vin tante carence di personâl e nus tocje fâ lis robis planc a planc.
__
Par finî, mi dîstu cualchi particolaritât dal Comun che no je tant nomenade e che ti plasarès che si cognossès di plui?
O ai gust di fevelâ di un progjet gnûf che o sin daûr a puartâ insom. Tal teritori dal Comun e je stade fate une piste ciclabile che ven sù di Puçui fin a Cjampfuarmit e che si colegarà cuntune che e ven jù di Udin. O vin fat modificâ il percors definît tal imprin par dâ mût ai cicloturiscj di gjoldi di cualchi biel paisaç che o vin tal nestri teritori. Une di chestis tapis che mi plâs marcâle al è il Mulin di Basandiele, un mulin che al è restât come une volte, ma comedât: al podarès ancjemò fâ il so lavôr. O vin inviât un “centri visitis” par fâ un percors vuidât par viodilu, pardabon un biel viaç tal timp. O cjapi la ocasion par invidâ i letôrs a vignî a provâ chest viaç.  ❚
………………………………
Cui che e je la sindiche di Cjampfuarmit
Erika Furlani, classe 1972, maridade cuntun fi, dopo de Maturitât sientifiche al Liceu «Marinelli» di Udin si è laureade in inzegnarie gjestionâl a Udin. Di mistîr e je ricercjadore te Universitât dal Friûl tal cjamp de ricercje dai materiâi. E je stade elete intal 2019 cul 55,34% des schedis validis. ❚
Dree Venier

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +