Pe seconde volte consecutive, il Ministeri al taie il Font di finanziament ordenari al ateneu di Udin. Lu disin clâr e taront lis tabelis publicadis sul sît dal Miur a metât Setembar, di dulà che al ven fûr che pe Universitât dal Friûl chest an il trasferiment al vâl 1,6 milions in mancul, rispiet ae anade prime cuant che za si veve vût un câl di 1,1 milions di finanziaments.
Ae fin, forsit cun cualchi cuote una tantum e cualchi contribût straordenari, il tai al podarès sbassâsi a 1,3 milions, ma chel che al è plui evident al è il fat che la Universitât furlane e je une des plui penalizadis, e no fâs dal sigûr part di chês 21 talianis che a àn vût auments di trasferiment, dentri di un font di finanziament ordenari 2017 che al valeve 6 miliarts, cuntun increment di 62,5 milions (+0,9% rispiet al 2016).
Bisugne dî che nancje la Universitât di Triest e jentre “tes miôr 21”, ma dut câs si beche ben 82 milions e 887 mil euros di trasferiments: a son 13 in milions in plui rispiet ai 69 che a son destinâts al ateneu furlan, che come al solit a varès di regjistrâ ancje chest an un aument sul numar di students.
Di bande sô, il Magnific Retôr Alberto Felice De Toni al à subit incjariât i siei plui strents colaboradôrs di fâ dutis lis verifichis dal câs. Jenfri lis valutazions, si è daûr a cirî di capî se a son gnûfs criteris introdusûts cualchi mês indaûr a penalizâ la Universitât dal Friûl, o se invezit i risultâts otignûts no son stâts valutâts te maniere juste a Rome: za l’an passât, comentant une situazion similâr, il retôr De Toni al diseve di jessi preocupât no tant pal valôr complessîf dal tai ma dal câl, stant i risultâts presentâts.
In sumis, ancjemò une volte la Universitât furlane e ven sotvalutade, viodût che za di une vore di agns i retôrs che le àn vuidade si son simpri lamentâts di vê vût mancul bêçs. Di bon al è, se no altri, che ancje par Udin e valarà la no tax area che i permet ai ateneus di esonerâ i students cun mancul di 13 mil euros di Isee, e di calmierâ chei jenfri i 13 e i 30 mil euros.
✒ Piero Cargnelutti
