SIMPRI BOGNS. Sergio Cecotti, Il President, Feagne, 2003

“Micjêl Bertòs al jes de palacine sviersât. La sene lu à disgustât. Al sbat la puarte cun rabie. Al va viers la sô machine. Il prin impuls al sarès chel di montâ sù e scjampâ vie. Lontan da chê int! Ma Micjêl al à un’altre idee. Si cuiete di colp. Al vierç la capote dal automobil. Al tire fûr il sac des macis, sal cjarie su lis spalis. Dentri, te palacine de Clape de Vele, a son daûr a fâ fieste. Un ghiringhel in grant, cun int impuartante, sorestants, bielis feminis”.
L’autôr al è cognossût tant che politic e fisic di innomine internazionâl. E al ven di domandâsi dulà che al cjate il timp di fâ ancje il scritôr. Par prionte, scritôr di stamp antîc, o disarès plui o mancul dal Sietcent, un secul che nol veve premure. Sicu che nol à premure chest romanç zâl metapolitic: 354 pagjinis, nuie mancul!
Pre Antoni Beline, che al firme la presentazion, le imbrucje juste cuant che al scrîf che ‘… ducj nô, salacor, o varessin saltât cualchi toc, gjavade cualchi espression che nus semeave pleonastiche e ripetitive, scurtât cualchi percors par rivâ prime a scuvierzi l’autôr di dut chel maçalizi’.
Il sens di dut il libri al è inte soluzion dal enigme afidade a une formule matematiche che il gjeni, indevant di doi secui, Tin Blanchin (protagonist za dal prin libri di Cecot, Il Tierç Lion), al pant intune sentade ae presince di ducj i maiorents e i pussibii suspietâts. Formule che, però, i vûl vudis cognizions matematichis superiôrs par capîle.
Lis pagjinis miôr mi son semeadis lis primis, chês che a contin il delit numar cinc e po chês dal colocui jenfri l’investigadôr, la contesse e la sô segretarie, intant di une cene a trê cui diaulins di fûr che no dome a scoltin ma a fasin fintremai coments su ce che a disin l’om e lis dôs dumblis.
Il libri al à ancje il presi impuartant di no vê talianisims e, di conseguence, une grande ricjece di lessic furlan, cun peraulis e espressions che no si doprin ogni dì: magalde (p. 41), stafarî (39), rassanât (54), tentimbon (67), bitince (84), cjamoie (88), catarigulis (126), sgarmetâ (169), gatamâ (202), casnà  (222), sofinâ, (224), ludidôr (235), picagnât (248), gosteâsi (300), gasparâ (311), mussain (311), trai sgumilicje (312), fâ crofe (297), sghignuçâ (326), fifeç (333), fâ muse di ufiel bulît (337), invuatî (353).
Une descrizion cence dûl di trop maucs e sporcs che a son i zûcs dal podê. Ma, par fortune, la realtât no je cussì: un coiar tant che ‘Sefut Çopul nol podarès mai deventâ ministri, inte realtât. Ma… cuissà… ❚
✒ Laurin Zuan Nardin