SIMPRI BOGNS. Gianni Nazzi, Giancarlo Ricci, La flôr des dètulis, Udin, 1995

“Alore ce mi còntistu, frut?” “No sai. Par dî, bisugne savê”.
E, naturalmentri, plui si sa, plui e miôr si pues dî. Alore Nazzi e Ricci a son lâts a sgjavâ il cjamp de lenghe furlane par tirâ fûr chestis perlis. Une cerce? Vele (Nazzi al dopre une sô grafie che no je chê uficiâl stabilide de LR 15/96, ndr): Stâ sul cˇhaval dal mat. Vê un spali dal numar un. Jessi Bete de lenghe sclete. Lavâj i pîs a un par bevint l’aghe. Tignî impiade une cˇhandele a la Madone e une al diaul. Jessi scùr tanche une bocˇhe di lôv.
Perlis cjapadis sù a câs jenfri lis primis setante pagjinis di chest libri preziôs, metût adun bielzà vincj agns fa, ma simpri bon. Il studi si compon di trê parts. Inte prime, i doi autôrs a cataloghin 1293 espressions talianis, cui ecuivalents furlans (cuasi simpri plui di un). La seconde e presente une schirie di tiermins talians significatîfs (par ordin alfabetic) che a permetin di rimontâ in maniere facile ae espression intierie. La tierce part e presente ancje cheste une schirie di tiermins, ma cheste volte furlans, che a rimandin aes espressions de prime part.
Duncje si trate di un studi meticolôs e resonât, metût dongje cun competence e cun criteri sientific. Un imprest util une vore e facil di doprâ: ti ven iniment une peraule, un mût di dî, une detule che e doprave la none…tu cjapis in man chest libri, tu ziris lis pagjinis…vele chi, e veve reson la none.
Eros Bassi, inte sô presentazion dal volum, al rivoche il mont di une volte, chel che al doprave chestis espressions. E nus dîs di chê straordenarie butade di un frut, che o vin citade in incipt. Carla Marcato, invezit, e firme une premesse di caratar linguistic, che e furnìs spiegazions su lis origjins des detulis plui coloridis: capî il morghin al à un riferiment al todesc morghen, capî il bergamo ai pastôrs che a vignivin di chês bandis là, girâ la Calabrie a une tiere lontane che cuissà dulà che e je, jessi une sinigoe a une lenghe che no si le capìs e v.i. In lâ a Patràs, po, i fats storics (a Patràs, citât greghe, a vignivin mandâts chei che a fasevin bancjerote e a Patràs i venits lis vevin cjapadis di brut intal 1466) si misclicin cu la etimologjie latine ire ad patres, vâl a dî murî.
Si reste scaturîts di cetant siore che e je la lenghe furlane: cualchidune di chestis detulis no si lis cognosseve, si lis veve sintudis cualchi volte cence fâur câs. E velis culì, dutis a puartade di man. ❚
Laurin Zuan Nardin