SIMPRI BOGNS. Gianluca Comar, Cosa resta delle case friulane del XVI secolo nella Bassa friulana

“Culì si viôt che che al reste di chiste cjasute dal cinccent, là che a ‘nd an mitût plui voltis man. Ca a viodìn dôs parêts, par devant e par daûr; primis dôs fotografiis. Te tierce foto, particolâr di ce che al reste di un arc di barcon dal cinccent”
Cheste volte o lin fûr dai schemis solits par fevelâ di un libri, un bon libri che al restarà simpri bon. Di tignî in cjase e di sfueâ cuant al ven sù il mat di visâsi alc che al rivuardi il teritori dulà che a si vîf.
Ce aial fat Gianluca Comar? Cuntune buine machigne fotografiche in man e une vore di cognossincis storichis e architetonichis intal cjâf, al è lât ator pai paîs de Basse: Dael, cu lis frazions di Uanis e di Navuac, Cjamplunc-Tapoian, cu la frazion di Cjavenzan, Rude, cun Sacilet, S. Vît de Tor, cun Crauì e Naiarêt e Palme, cun Jalmic. A fotografâ lis cjasis di une volte, ce che al è restât des cjasis di une volte. No son tantis, massime chês che a van indaûr fintromai al secul XVI. Ma a son bielis. E ancjemò plui bielis a podaressin sedi se si rivàs adore a ristruturâlis cun criteri e cun inteligjence. Cualchidun lu à za fat (ancje Gianluca lui stes) e cumò al à une biele cjase, plene di storie e di memoriis di podê savorâ, lui, il paron, e ancje ducj chei che a passin li dongje.
Cualchidun altri al à butât jù dut o ben al à pastroçât cul ciment e cumò al à une cjase magari moderne, ma cence anime. E brute, bisugnarà pûr dî il vêr: la grande part des cjasis modernis a son brutis.
Ma ce maniere si fasie a capî se une cjase e je antighe? Doi segnâi: une fasse di modons a dint di see sot de linde e barconetis a arc cuntune fasse di ornament al nivel che la linee dal barcon e tache a pleâsi intun semicercli. E po, bisugne fâ atenzion: des voltis a son des anconis drenti intai mûrs che a samein propi che a sedin stadis, une volte, des barconetis.
E alore, ancje cence vê la competence di Comar, al sarà biel lâ atôr par chescj paîs, magari cu la biciclete e cjalâ in sù e in bande. I tesaurs a son li che nus spietin. Memoreìn dome doi, salacor i plui preseôs: la Cente di Uanis e la cjase dal mulinâr di Navuac.
Il libri al è completât di une prefazion di Luca Bidoli e al è editât par cure de associazion Natiso cun Turro (il Nadison e la Tor!), che e je aromai un pont di riferiment par dute la ricercje storiche in Basse. Dutis lis didacaliis des fotos a son bilengâls, talian e furlan. ■
Laurin Zuan Nardin