LA FABRICHE DAI… LIBRIS – GNOVIS IN VETRINE. Il contadin e il diaul

La esperience didatiche metude adun dilunc de Istât dal 2010 de pro loco di Ruvigne tal parc comunâl, e à cjapât forme intun biel librut dal titul “Il contadin e il diaul”.
Chest lavôr, realizât dal mestri Giorgio Pascoli e Stefania Agostinis, ducj i doi di Ruvigne, al à il merit di furnî plui insegnaments metint insiemi la tecniche artistiche, la conte di une storie di paîs e l’ûs de lenghe furlane.
Si comence di fat cu la narazion de furbetât dal contadin che al met tal sac il diaul par no fâsi puartâ vie i sudôrs dal so lavôr, fasint jentrâ cussì i frutins te dimension de nature e dal mont agrari.
La storie e devente un pretest par tacâ a fâur cognossi lis verduris che a cressin sul nestri teritori, gjavant fûr peraulis e nons des plantis aromai dismenteadis, e mostrantiur il procès di produzion dal mangjâ.
Po dopo e je la volte di provâ, cu la tecniche dai acuarei, a dissegnâ lis verduris daûr lis indicazions dal mestri Pascoli, un mût divertent par cjapâ confidence cui materiâi didatics e par fâ lavorâ la fantasie.
Lavorâ cui fruts su chestis tematichis al à ancje permetût di frontâ il teme de “Biofesta”, une fieste che e je deventade simpri plui impuartante par Ruvigne e no dome, o ben spiegâur ce che al vûl dî valorizâ la produzion e il consum di prodots dal teritori e la sielte di fâ arlevament o agriculture biologjiche.
I autôrs, ducj i doi impegnâts tal mont dal insegnament e de tutele de lenghe furlane (a àn di fat cjapât il Master di II nivel “Insegnâ in lenghe furlane” li de Universitât dal Friûl) a son ancje curadôrs di progjets pe valorizazion dal furlan, convints che une lenghe, ancje se “minoritarie” e sedi une ricjece in plui e no un limit. Par chest motîf il fin di chest lavôr, realizât ancje in gracie dal contribût de Provincie di Udin, al è chel di podê jessi doprât ancje tes scuelis, par furnî un strument didatic in plui te ufierte formative in lenghe furlane. ■
Venusia Dominici