SIMPRI BOGNS. Egle Taverna, Claps dal Lusinç, Feagne 2016

«A son claps / come lis peraulis / peadis / a une tiere, / slissadis de aghe / come une cjarece / e di fûc / cuant che il soreli / al bruse. / Claps / che il timp / nol consume / come il spirt / di un sintiment / che al reste / par simpri / come piere / no strussiade / de buere / che e stralûs / tal rai di lune»
Chest il test de prime poesie (ripuartade ancje in cuarte di cuviertine) di cheste racuelte che i da ancje il titul a dut il libri. Un libri elegant e ben curât, editât par cure dal Istitût Achille Tellini di Manzan, inte sô golaine Leteradure.
Egle Taverna e inricjìs cussì doi filons de poesie furlane: chel dal Friûl di soreli jevât e chel de poesie al feminin, che za al cognòs lis vôs ferbintis di Novella Cantarutti, Elsa Buiese, Nadia Paoluzzo, Ida Vallerugo e ancje chê resinte di Lussia di Uanis.
Cheste racuelte si presente in trê sezions, dôs di poesie e une di prosis. Lis primis cuarantecuatri lirichis a son nassudis par furlan e la autore nus da la traduzion taliane (e par dôs ancje une biele traduzion par spagnûl); chês altris dodis a nassin par talian e a son stadis voltadis par furlan. E infin, siet contis in prose inte dople version furlane e taliane.
I argoments a son chei che za si cjatin in dute la produzion poetiche di Egle, vâl a dî la nature, prime di dut, cjalade cun voli naif, scuasi di frut pront a maraveâsi in rimpet dai spetacui che jê e je buine di ufrînus (o segnalarès in particolâr, di chest pont di viste, la poesie Avrîl di p. 81); leât cun chest argoment al è chel de nostalgjie pe infanzie, dal displasê pe pierdite di un mont, chel de civiltât contadine, che nol è plui, cancelât di un progrès che no simpri al à rispietât la culture, la lenghe e nancje cualchi volte la dignitât de persone. Leade al cori des stagjons e je ancje une altre tematiche, chê de liturgjie, vâl a dî des fiestis o solenitâts religjosis che a compagnavin i moments de vite des personis.
Il libri al è insiorât di ben cuatri introduzions: chê di Luîs Gjeromet, president dal circul Tellini, chê dal sindic di Migjee (paîs di divignince de autore, mai dismenteât), chê dal president de Casse rurâl di Caprive, Fare e Lucinins e chê di Odorico Serena, come simpri robuste, documentade e plene di riferiments culturâi sigûrs.
In plui, ancje la Taverna stesse e introdûs la sô vore, mostrant ce che e je, pal so mût di viodi, la poesie.
✒ Laurin Zuan Nardin