SIMPRI BOGNS. AA.VV. ‘Riviei di ingjustri. Lis contis a fumuts dal premi Friûl 2010’, Basandiele 2011

“Chel de joibe grasse dal 1511 al è stât il plui grant riviel popolâr che si à vût in Friûl. Magari cussì no, a son ancjemò tancj chei che no cognossin cheste pagjine impuartante de nestre storie. Il ricuart de rivolte al è restât par secui inte memorie des comunitâts furlanis ma si à po sfantât a planc a planc par lassânus dome cualchi fruçon strassomeât intes contis popolârs che a son rivadis fin in dì di vuê”.

Al somearès l’incipit di un studi di storie, di chei plens di datis, di personaçs, di tabelis. E invezit e je la introduzion (firmade di Carli Pup, che al è ancje l’autôr dal coment storic) a siet contis a fumuts (di Guido Carrara, Lorenzo Manià, Nicola Angeli in cubie cun Fabio Varnerin, Enrico Tomasi, Eleonora Spizzamiglio, Emilio Bertossi e il grop MaMaRuTo),che a contin ducj i acjadiments di chê joibe grasse dal 1511 a Udin e ator vie pal Friûl. Se si fâs passâ a la svelte lis pagjinis dal libri (74), si marche subit la diference di stîl des contis: ai dissens colorâts di Carrara i ten daûr il blanc e neri suturni di Manià e po chel caligrafic di Angeli e Varnerin e chel plui aiarôs dal MaMaRuTo. Si passe po a la elegance feminine de Spizzamiglio, par finî cuntune altre tonalitât scure, chê di Bertossi.
Lis storiis  a misclicin passât e futûr, realtât storiche e fantasie, fiestis in mascare e tratôrs, trastolons e cernidis, intal memoreâ chei fats di violence straordenarie: dutis a mostrin ben il clime di malpazience dal popul che al jere stuf e plui che stuf di sopuartâ la fan, lis strussiis, lis angariis e la prepotence dai sorestants. Naturalmentri, daûr di dut chest, e jere la lote jenfri Strumîrs e Çamberlans e al jere cualchi nobil che al saborave la int. E, come che al sucêt, il cont plui saurît des violencis di chel riviel lu paià ancjemò il popul.
Biele cheste idee di vierzi la culture furlane a cheste forme di espression zovine e inovative! Il merit al è de Cooperative di Informazion Furlane e de Associazion 1511, sore che di Radio Onde Furlane che e à vût inmaneât il premi Friûl 2010, dulà che a àn vût partecipât chestis siet bielis contis. ❚
✒ Laurin Zuan Nardin