SIMPRI BOGNS. A Flavio Vidoni (par cure di) Robis di fruts. Poesie di Celso Cescutti, Flaiban, 2016

“Cjavaz, paîs scuindût lassù tra i arbui / su par chê rive: biel ricuart penôs. / ‘E vîf lassù incjimò la frute ch’o cjatai / zemint sot la sô cjarie, sfadiade, / ch’a mi disè il paîs ch’o domandai”
Cussì e scomence une poesie di Celso Cescutti (Flaiban 1877 – 1966), che no jere mai stade publicade e che cumò e cjate puest in chest volum che il Comun e la Pro loco di Flaiban i dedichin al siôr Celso intal cincuantesim inovâl de muart.
Volum che al cjape dentri la riproduzion anastatiche de opera omnia di Cescut, vâl a dî lis sôs cuatri racueltis poetichis: Primevere (1911) firmade cul pseudonim di Settimo Agreste di Vilebuine; Roses di pradarìe (1921), firmade Argeo; Inzalidis d’autun lis fueis a colin (cence date, ma facil che e sedi dal 1926), firmade Settimio e, infin, Nêv e fantasiis / realtât e poesiis (ancje cheste cence date, ma probabilmentri dal 1929), firmade S.A. di V.
Cheste ultime racuelte e je insiorade dai biei dissens di stîl naïf di Asterio Peressi e des notis esplicativis dal poete stes, che ancje se a talianotin un pôc, a son un biel esempli di prose furlane.
In plui des introduzions dal sindic, dal president de Pro Flaiban e di chel de BCC dal Friûl di Mieç che e à sostignude la operazion, il curadôr al zonte une sô jentrade sul teme di Flaiban lûc di poesie, la biografie dal poete, une descrizion de sô opare, de sô poetiche e de sô filosofie, une schirie di testemoneancis di epoche e analisis critichis de poesie di Cescut: a àn vût fevelât di lui Zuan Lorenzoni, Bindo Chiurlo, Zorz Faggin e po D’Aronco, Virgili, Verone, Pilutti e, soredut, Pasolini che al à includût il poete di Flaiban inte antologjie de leterature dialetâl che al à curade parie cun Mario Dell’Arco intal 1952. E no si pues no restâ scaturîts de paronance di analisi e de sgrimie di PPP che nol à pôre di criticâ un poete che al jere ancjemò in vite e amirâ la sigurece che al mostre intal sielzi cualchidune jenfri lis robis miôr di Cescut.
Tant che poete, Cescut si insuaze intes olmis di Çorut (no par nuie al dopre ancje la sô grafie), ma li che il poete di Lonzan al cjale e al descrîf, chel di Flaiban – daspò di vê cjalât – al pense, al medite e si fâs domandis. Un biel pas indevant inte storie de poesie furlane. E gran merit a cheste publicazion che nus al fâs cognossi in maniere cussì complete. ❚
✒ Laurin Zuan Nardin