Sfuei Mensîl Furlan Indipendent
Archivi de Patrie

Semenâ flôrs biei di viodi… e bogns di mangjâ: la sielte di Mariangela Avon pe Val Tramontine

Erika Adami
Mariangela Avon tal so cjamp di flôrs

Ancje se i servizis a mancjin, tra lis mês monts, al è dut un altri vivi

Dolçs preparâts cu lis rosis di “Fiori di Mari”

«O vevi voie di fâ alc di bon pe mê val». Pocjis peraulis, che a contin dut l’amôr di Mariangela Avon pe “sô” Val Tramontine li che e à vivût a dilunc prime di lâ a stâ a Spilimberc. In Val Tramontine, Mariangela e à lassât il cûr e al cûr – si dîs – no si comande. Cussì, intal Fevrâr dal 2020, e à pensât di meti in pîts une ativitât intal paîs dal pari, Tramonç Disot, trasformant in lavôr la sô grande passion pes rosis. Su terens di famee, e à tacât a semenâ flôrs: biei di viodi… e di mangjâ!
◆ Se la idee us somee stranie, tignît cont dal fat che di flôrs o ‘nt mangjais za un grum, di regule, e cence pensâi parsore: dal fîc al articjoc, dai brocui ae camamile, de malve aes rosis di coce e coçut.
◆ Mariangela Avon e à selezionât lis varietâts che a van miôr dacuardi cul ambient e il clime de Val Tramontine par podê otignî prodots di alte cualitât. “Fiori di Mari” e je une aziende agricule a conduzion familiâr specializade inte produzion biologjiche di flôrs comestibii e di plantis aromatichis. «La idee e nas de volontât di coniugâ la fuarte passion pe nature e il riclam ae tiere cul desideri di vierzi une ativitât imprenditoriâl in Val, une tiere siore di risorsis e cun grandis potenzialitâts, che e je daûr a provâ a invertî la tindince al dispopolament e al abandon, che e unìs i teritoris di mont».
◆ A Tramonç Disot, «o coltivìn lis nestris plantis in plen cjamp in mût naturâl, cence doprâ prodots fitosanitaris o robe chimiche, lant daûr de stagjonalitât. O cjapìn sù i flôrs e ju confezionìn a man, un par un, cun delicatece e tante cure par preservâ dutis lis lôr proprietâts. In gracie de culture biologjiche, a àn cualitâts naturâls ecezionâls, un bon arome e a son une vore biei, fatôrs che a favorissin il lôr ûs in cusine sedi intai dolçs (tortis, crostadis, biscots, pastis) sedi intes ricetis saladis tant che salatis, mignestris, cjars e prins plats. Lis rosis, frescjis e secjadis, a zontin colôr e gracie a ogni ricete, ma ancje savôr».
◆ Inviâ une ativitât e je simpri une sfide, ma fâlu in plene pandemie di Covid – cui principâi clients, i ristorants, in zenoglon – e domande tante determinazion e une biele dose di coraç. «Mi soi butade ta cheste aventure cence nissune esperience intal setôr agricul – e ricuarde Mariangela –. O ai simpri lavorât intes ativitâts di famee: papà al veve un albierc a Tramonç Disot, po une aziende di autotraspuarts e une piçule imobiliâr. O sin partîts dai terens di gno pari cun chê di creâ une coltivazion di noglârs e po o vin cuistât cualchi toc dongje; in Val a ‘nd è tancj bandonâts e plens di baraçs, e la proprietât fondiarie e je cetant framentade. O vin metût jù il prin etar di noglârs e 2 mil metris di flôrs che si puedin mangjâ. Cumò i etars a noglârs a son deventâts doi e 6 mil i metris coltivâts cun aromatichis e rosis. Il clime al è ideâl e la tiere une vore buine. Le vin svegrade e coltade, ma no masse, parcè che une volte su chescj terens a jerin orts e a son restâts morbits – e conte Mariangela che ju lavore cul om, marcjesan –. O tachìn a preparâju intal mês di Avrîl, a semenâ e a meti jù lis plantutis. La sfloridure e tache de metât di Jugn e e va indevant fin in Otubar, e, in chel, ancje la racuelte».
◆ Cualchi varietât di flôr – tant che il nastruç, la calendule, il scloponut, la barburice – di plui che jessi doprade tant che frescje, e ven secjade: une particolaritât de aziende “Fiori di Mari”. «Cun tante pazience, o tirìn vie i pics, che a son siôrs di antiossidants, e ju secjin pal plui in dissecjadôrs. Infin, ju metìn vie in grandis scjatis, intal sut e cence conservants». Cun chest passaç il gust e il profum a restin intens e i colôrs vivarôs, tant biei che «ristorants di alt nivel e ambients atents ae sielte des materiis primis, nus ai domandin par decorâ i plats che a servissin ae lôr clientele».
◆ La rose plui domandade de ristorazion e je la barburice, che e cres li che la tiere e je buine e no si doprin chimichis, e che e je ancje la preferide di Mariangela. Une vore preseâts ancje i flôrs di Cosmos bipinnatus, par decorâ salatis e dolçs; chei, crocants, de bocje di leon dal gust fresc e di pome; la viludine, speziade e che e nulìs di agrums; la calendule, cu la sô misture di notis picantis, dolcis e impeveradis.
◆ Il prossim pas al è chel di vierzi a Tramonç Disot un laboratori cun dut ce che al covente par secjâ e par lavorâ sul puest lis rosis e lis jerbis aromatichis, e vendilis. E, cui noglârs implantâts, tra cualchi an e tacarà ancje la produzion di nolis. «In Val, tra lis mês monts, al è dut un altri vivi. Pûr tra tantis dificoltâts – servizis che a mancjin, stradis mal metudis, assence di invistiments… –, ca sù o soi contente, o stoi ben», e dîs Mariangela, che, di vincj agns, e je segretarie de Pro Loco Valtramontina, motôr di tantis iniziativis che a àn fat cognossi la Val e la sô nature incontaminade, i siei savôrs autentics, tradizions, borcs e mistîrs antîcs. «La Val Tramontine e je patrimoni di ducj. E, cun cheste cussience, si sin simpri impegnâts, dì par dì, par tutelâle e valorizâle pes gjenerazions dal doman». ❚

:::::::::::::::::::::::::::::::::::::::::::::::::::::::::::::::::::::::::::::::::::::::::::

Lis “gnocis” cun farinis e formadis speciâi

Cualchi flôr al è bon par esaltâ salatis, altris a stan ben tes mignestris, altris ancjemò a son dolçs e cualchidun al beche. Une sorprese di guscj e une maravee pai voi che a van dacuardi cun farinis e formadis speciâi in prodots dai profums e savôrs unics. “Fiori di Mari” e furnìs i siei flôrs secs ae Aziende agricule Li.Re.Ste di Merlane di Trivignan, che cun chei e afine deliziosis caciotis di lat di vacje, e al For di comunitât “Pan dal Des-Distret di economie solidarie” a Udin, che al lavore lis farinis di grans antîcs de filiere curte “Pan e farine dal Friûl di Mieç” (atente ai aspiets produtîfs, ma ancje a chei comunitaris e sociâls ativant relazions tra produtôrs, trasformadôrs e consumadôrs). Cussì a nassin pagnochis bielis, che a san di bon e di just.
◆ In curt, in gracie di gnovis colaborazions, a rivaran ancje pastis di formenton e scaletarie artesanâl di alte cualitât. ❚

………………………………………………………………………………..

IL PROFÎL

“Fiori “Fiori di Mari” e je une aziende agricule a conduzion familiâr nassude par iniziative di Mariangela Avon, 55 agns, di formazion resoniere, origjinarie de Val Tramontine, che e à coinvolzût ancje la fie Paola Imperatori, titulâr de ativitât.
◆ Paola, 21 agns, e studie Fisiche te Universitât di Triest, e te aziende di famee si ocupe de part aministrative, ma ancje de fase delicade dal confezionament des rosis, in plui di frecuentâ i cors di formazion che a coventin. Mariangela – cul om – e met, invezit, lis mans te tiere: le prepare al miôr prime di semenâ e plantâ flôrs e aromatichis, le ten netade. E cjape sù lis rosis e e sta daûr a dutis lis fasis di essicazion e confezionament dai flôrs, che a vegnin vendûts in buteghis di paîs e intai marcjaduts e, pal plui, a ambients e ristorants che ju doprin par decorâ plats e creâ preparazions dai savôrs particolârs. Une riscuvierte resinte: ju dopravin ancje in epoche romane e in Cine aromai di miârs di agns.
◆ “Fiori di Mari” si presentarà al public cuntune schirie di jessudis sul cjamp, cun degustazions, tra Lui e Avost. Informazions sul sît www.rinatura.it

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +