Scuele: l’an al tache çuetant

L’an scolastic 2016-2017 in Friûl-Vignesie Julie si è vierzût cun tune schirie di polemichis. Se di une bande i concors pai insegnants, lis graduatoriis e l’assegnazion  des catedris a àn fat vignî mâl di panze a plui di cualchidun, cussì come problemis te partence des lezions, di che altre al à fat scjas il messaç di bon inizi pes lezions lançât di bande dal Ufici scolastic regjonâl.
Un auguri bilengâl dome par talian e sloven. E par furlan o par todesc? Nuie. Par chest il conseîr provinciâl di Patrie Furlane, Federico Simeoni, al à presentât proteste formâl al ufici teritoriâl dal Ministeri de Istruzion, domandant spiegazions par un compuartament che nol rispiete lis minorancis dal teritori: «Cun maravee o ai let il vuestri messaç di augûrs pe scree de anade scolastiche sul vuestri sît istituzionâl. Plui disapont che maravee, in veretât» al à zontât Simeoni «par vie che il salût uficiâl al è stât fat dome tes lenghis taliane e slovene, dismenteant la presince di chês altris dôs minorancis inte vuestre jurisdizion, chê furlane e chê todescje. O speri che nol sedi chest il vuestri mût e chel de Regjon di prudelâ lis minorancis, dividintlis in grups cun tutele di serie A e cun tutele di serie B. O confidi che di cumò indenant o metedis plui sensibilitât, atenzion e risorsis ancje viers cheste cuistion. O saludi cun rispiet».
Di bande sô, il coordenadôr regjonâl dal Ufici, Pietro Biasiol, al à rispuindût che il salût a no voleve ofindi nissun, ma dome dâ il bentornât a scuele dopo lis vacancis a students e personâl. Il fat che a si veti usât dome il talian e il sloven, secont Biasiol, si justifiche pe presince istituzionâl di scuelis di lenghe taliane e scuelis di lenghe slovene: «il gno nol voleve jessi un salût a lis minorancis ma ai uficis, al personâl, ai insegnants e ai zovins. Chel salût al podeve vegni replicât in cincuante lenghis, tantis chês ca son lis culturis ca si messedin ogni dì tes scuelis de regjon». Al reste il fat che, lu dîs la leç, «in Friûl-Vignesie Julie si doprin cuatri lenghis uficialmentri ricognossudis», no 50 (par cumò)… Sperìn che al coventi di lezion pal prossim an. ❚
✒ David Zanirato