Scuele di Mosaic di Spilimberc, une ecelence dute furlane

Un dai primâts culturâi furlans al è gjoldi de presince de Scuele par Mosaiciscj di Spilimberc che tal 2022 e je rivade a 100 agns di ativitât. Tecnicamentri e je un cors post-diplome di trê agns ma pal Friûl e je cetant di plui.
◆ E à lis sôs lidrîs intun periodi là che i furlans a levin ator pal mont sburtâts de miserie: e coventave trasmeti la cognossince di une art antighe che ur permetès di cjatâ lavôr metint dongje creativitât e perizie artesane. Tal mont a jerin in pôcs a vê lis cognossincis tecnichis necessariis; par chest tancj furlans si son fats onôr. Dai agns Vincj ai Cuarante la Scuele e à diplomât 300 zovins, metint jù plui di 10 mîl metris cuadris di mosaic al Foro Italic a Rome e lavorant intal forest in localitâts come Oslo, Shangai e Toronto.
◆ Dopo de Vuere une gnove strade e je stade chê de colaborazion cun pitôrs e artiscj che a àn domandât ae Scuele di “tradusi a mosaic” i lôr progjets. Cundiplui a son stâts realizâts intervents in lûcs consacrâts tant che il Templi Ossari di Udin, Madone di Rose a Sant Vît, il Sacrari di Gjargnà, la Grace Lutheran Church di Mankato tal Minnesota e la glesie di Sante Cunegonde a Detroit.
◆ Ancje tal gnûf mileni la Scuele e cîr gnovis direzions indreçantsi viers dal arêt urban e dal design. A son esemplis di cheste fate oparis tant che la “Saetta iridescente” che la Regjon Friûl-Vignesie Julie e à donât ae citât di new York pal World Trade Center Transportation Hub, o il cicli musîf pe Volksbank di Graz in Austrie, e, a nivel regionâl, i stabiliments balneârs di Lignan Pinede, la composizion te Glesie de Sacre Famee di Pordenon, i panêi dal percors religjôs “Cercivento: una Bibbia a cielo aperto” e i memoriâi di Novella Cantarutti e des feminis di Raussêt.
“La nestre Scuele, puartant indenant l’insegnament e la valorizzazion di une art antighe e nobile tant che il mosaic, e je pont di riferiment e di atrazion culturâl e turistiche, un valôr di ecelence par dute la regjon”, nus dîs il diretôr Gian Piero Brovedani. “Al è l’unic puest là che si impare sedi l’aspiet tecnic che chel artistic di cheste dissipline e che e dà ai mestris mosaicisc la capacitât di meti dongje la part ideative, progjetuâl e realizative dal lavôr (de creazion del disen ae preparazion dal supuart in ciment, al tai des tessaris, ae composizion); in cheste maniere o garantìn une buine prospetive di inseriment lavoratîf”.
◆ “L’interesse pe nestre Scuele – al continue Brovedani – al è in cressite, e lu disin i numars, parcè che, jessint la Scuele vierte al public e visitabile dute la setemane, o vìn une medie di 40 mîl presencis ogni an, e la tindince e je a cressi. A strissinâ tancj viers de nestre scuele a son ancje i cors di introduzion al mosaic che o inmaneìn ogni an di Avrîl a Dicembar”. Ancje i progjets a son un biel reclam: “o stìn realizant, e pal 2025 al sarà finît, un mosaic grandonon (1300 metris cuadris, ndr) pe pavimentazion esterne dal nestri istitût. Al sarà intun stîl che al riclame chel carateristic de ete di Aquilee, e al larà a rapresentâ in detai flore e faune de regjon, “jù des monts infin dal mâr”; la opare e sarà une des plui vastis dal mont, e atirarà une vore di turiscj. Ma e je dome une des tantis iniziativis che o fasìn a nivel internazionâl, che e varan la ponte inte nestre partecipazion cu la Regjon al event de Expo 2025 di Tokyo”. ❚