SCOMENCÂTS PAR FURLAN. Su la strade di Jack Kerouac

par cure di Pablo Gortan e Dree Venier
traduzion di Lussia di Uanis
La prima volta che cjatai Dean al fo pôc timp dopo che jo e la mê femina si erin separâts. Vevi pena superât una lungja malatia, ma no mi piardarai a cjacarà di chest, si che duncja al veva vût a ce fâ cu la pena dal faliment e cul sens di banda mê che dut al fos muart. Cu la rivada di Dean Moriarty ta chel toc da mê vita, al era tacât chel timp che si podares clamâ, la mê vita su la strada.
Prin di chê volta a vevi dispès sumiât di lâ a soreli a mont e viodi il continent, simpri fasint un grum di plans e cença mai partî. Dean al è il tipo parfet par un viaç parcè che al è nassût propit dilunc da strada, cuant che i soi gjenitôrs a passarin par Salt Lake City tal 1926, cuntun masanin, par lâ a Los Angeles. Lis primis vôs su di lui mi lis veve dadis Chad King, che a mi veva fat viodi cualchiduna des sôs letaris scritis intun riformatori dal New Mexico. Mi vevin cjapât dentri una voronona parcè che i domandavin a Chad intuna maniera dolça e candida di insegnâi ogni roba su Nietzche e ducj i maraveôs argoments inteletuâi che Chad al cognosseva. A un ciart pont Chad e jo a vevin cjacarât des letaris e si erin domandâts se mai lu vessin cognossût chel strani di Dean Moriarty. Dut chest sucedeva tant timp fa, cuant che Dean nol era chel che al è vuê ma solamentri un zovin galeot involuçât di misteri.
————————————
Il libri e l’autôr
Chest 5 di Setebar al cole l’inovâl dai 60 agns de publicazion di On the Road (Su la strade) di Jack Kerouac. Al è un diari di viaç a torzeon pal continent american, ma al è ancje il ritrat di tancj dai personaçs de Beat Generation, moviment di rignuviment culturâl e leterari tacât tra i agns ‘40 e ‘50 dal secul stât. Il viaç, che al sedi fat di chilometris di asfalt o che al sedi un percors dentri vie che al mene a gnovis ideis e discuviertis (tal cidinôr di une montagne, tun incuintri, o ancje midiant dal consum di droghis e alcul), al à vût par Jack Kerouac (1922-1969) une funzion di ricercje passionade di formis di pinsîr libertariis e religjosis (Kerouac al jere catolic convint e al cirì ispirazions ancje te spiritualitât orientâl), in oposizion a la morâl comun, refudant il militarisim e il mît dal “American Dream”.
—————————————-
Il tradutôr
Il toc che us proponìn chest mês nol è, par sielte te tradutore, scrit in coinè ma intune “variante”. Come che nus à dit Lussia di Uanis, «al me furlan al sbrissa simpri fûr da sìnis, fra il misclisot des finâls in A, il me vivi a Mortean e l’anima trastolon-bisiachistana». Lussia e je poete, pitore, musiciste. Tai agns ‘90 e à fat part dal coletîf dai Trastolons, publicant soredut su la riviste Usmis, che e à savût rignuvî la leterature furlane cuntun lengaç moderni, “babelic” come che al è stât definît. Tra lis plusôrs ativitâts e voris artistichis di cheste autore ecletiche, ricuardìn il progjet musicâl Eletriche Skeletriche Poetiche, i tancj preseôs libris e spetacui pai fruts e i tescj pal teatri Poemas par une tiere maludide e Canto per le donne resistenti.