Salvâ la cjase di Francesc di Manzan par valorizâ la vocazion europeane dal Friûl di Jevât

La storiografie analistiche furlane dal Votcent e je dominade de figure di Francesc di Manzan che al cjapà sù in maniere forsit masse compilative, forsit masse patriotiche, une buine part des informazions che ancje in dì di vuê i storics no puedin fâ di mancul di doprâ. Al à zirât une vore, di Graz a Padue, di Belum a Vicence, di Udin a Triest: ma la sô cjase e jere a Insic, in comun di Cormons.
◆ Dal mês di Otubar dal 2020 cheste cjase e je in vendite: e lant daûr des risultancis di une cunvigne inmaneade de Associazion Judri pôc timp indaûr, par che no si pierdi la vocazion culturâl e identitarie de dimore di un dai plui impuartants storics furlans, la conseire comunâl Elena Gasparin e à fate une propueste ambiziose. La idee e je chê di meti in pîts un acuardi di colaborazion jenfri public e privât par sistemâ la vile e metile a servizi dal teritori, fasintle deventâ un centri di contat cuntune tiere siore di lenghis e di culturis diferentis. Lis sôs struturis a podaressin di fat coventâ par spazis di lavôr in condivision, soredut intal setôr des gnovis tecnologjiis. Cumò che gnovis formis di vore a vegnin sperimentadis cun grande facilitât, Insic – pe sô prossimitât gjeografiche e culturâl cul cûr de Europe – al podarès deventâ une mete atrative par professioniscj e impresis che a cirin un ambient multiculturâl dulà insedâsi e par ducj i “nomats digjitâi” che a van a torzeon ator pal mont cirint stimui e novitâts. “Cun di plui, la residence e tornarès a disposizion dai cormonês, cuntune forme di turisim – e dîs la Gasparin – mancul predatorie rispiet al nestri patrimoni” naturâl e culturâl.
◆ Al è clâr che al covente il jutori des istituzions. I finanziaments, salacor ancje pe presince di Informest a Gurize, a van cjatâts e la presince ae cunvigne de Fondazion Carigo e podarès lassâ sperâ ben. Ma covente movisi in curt, par evitâ che la vile e ledi a patràs e par permeti che e deventi di gnûf un pont di riferiment par dut il contest dulintor. Un contest che al è simpri stât di confin, prin jenfri Patriarcjât e Contee di Gurize, po jenfri Vignesie e Imperi, Ream talian e Austrie Ongjarie, e ae fin Italie e Jugoslavie. La vocazion europeane di cheste tiere e je clare: “chescj teritoris a àn simpri rapresentât un model di convivence di tantis culturis e sensibilitâts. Zaromai tal 1459, al à contât Sergio Tavano intal so intervent, un venezian al diseve che a Gurize si fevelavin talian, todesc e slâf: plui codiçs di lenghis par pandi plui prospetivis che no vevin cetancj contrascj. Fintremai tal Votcent no si cjalave la nazionalitât dal pari di famee, ma la lenghe che e jere doprade in ogni cjase. Come che al marche Tavano, la Patrie dal Friûl e la Diete di Gurize a pandevin in tantis lenghis la ricjece des lôr popolazions. Chest al varès di judânus a capî che lis lenghis no àn di jessi un element di separazion, ma di morbin culturâl. Che nus covente plui di simpri cumò che il teritori dal Friûl di Jevât al fronte doi events impuartants, tant che la candidature dal Cuel/Brda a Patrimoni de Umanitât dal Unesco e il futûr di Nova Gorica e Gurize come Capitâls europeanis de Culture dal 2025. ❚
Redazion