Ristampât il libri La Tribù di Levi. Dopo La fabriche dai predis, il libri plui cognossût di pre Beline

Secont Agnul Floramo «Dopo il clamorôs e discutût La fabriche dai predis, probabilmentri il libri plui cognossût e contestât di pre Antoni Beline». Al è La Tribù di Levi – Vitis di predis, un libri aromai impussibil di cjatâ stant che al è stât fat ritirâ dal marcjât, li che pre Toni al racuei episodis e storiis di vite dai predis, il “prodot de fabriche”, e lu fâs cul stîl e il snait che di simpri a àn caraterizât la sô produzion leterarie.
Floramo al descrîf il scrit come «Storiis di pioris e di pastôrs par contâ un Friûl che forsit nol è plui». E al marche cemût che pre Antoni Beline al à di simpri risiervât peraulis scletis ae Glesie, «criticade cun spirt di libertât propit parcè che amade di un amôr che si fonde però simpri sul Popul dai fedêi; dal moment che no sarès Glesie cence ‘Plebs’, e nol sarès Popul cence il so Pastôr».
Il libri cumò al ven burît fûr te suaze de Opera Omnia, il progjet di publicâ dutis i scrits di pre Antoni Beline. Une iniziative volude dal President de Provincie di Udin Pietro Fontanini, che tal 2009 le veve fate partî cuntun finanziament dedicât. Par Fontanini «Pal Friûl par fortune che a son stâts i predis, inteletuâi che a àn savût stâ dongje de int pe tutele des nestris lidrîs: la mozion dal clero, la ativitât di pre Marchet, l’autonomisim di pre Placerean, la nassite di Glesie Furlane tal 1974… E come aministradôr o soi content di vê finanziât a Glesie Furlane la publicazion de Opera Omnia di chest grant inteletuâl».
Cun la Provincie di Udin, il volum al è stât finanziât ancje de Regjon e de fondazion Crup. Lionello D’Agostini, il president, al veve dit vie pe presentazion de opare fate in Lui te sede di vie Manin a Udin «O ai tant plasê di ospitâ la presentazion di La Tribù di Levi parcè la nestre fondazion e crôt a fuart te nestre identitât furlane, la nestre culture, la nestre lenghe». Cun di fat il libri al è jessût ae fin dal 2015, ma cumò si è daûr a fâ lis presentazions par fâlu cognossi, in Fevrâr e jere stade chê di Vençon, e a saran altris ocasions.
Par savêlis e par  restâ inzornâts su la ativitât di Glesie Furlane si pues consultâ il sît www.glesiefurlane.org o la fanpage www.facebook.com/glesiefurlane e par domandâ i libris di pre Antoni Beline, si pues scrivi a info@glesiefurlane.org. ❚
✒ Redazion