Dai 18 ai 21 di Jugn tancj musiciscj e artiscj furlans intune grande esperience imersive
par un public larc: zovins, grancj, fruts e fameis
Tal bosc de Val ‘Saisare, framieç dai peçs ros che a dan vite al len armonic, la musiche e torne a jessi materie vive, respîr, vôs, vibrazions. Al è chest il spirt di Risonanze Festival, che dai 18 ai 21 di Jugn al torne a animâ Malborghet e Valbrune cu la sô edizion numar 11.
◆ No dome concierts bielonons e liutarie di alt nivel, ma ancje spassizadis e escursions inte nature, moments di benstâ, degustazions, incuintris, laboratoris, ativitâts par fameis e fruts. Un fin di setemane lunc par scuvierzi, scoltâ e condividi un patrimoni che al rivoche in plui manieris: cui struments, cui pas, cui savôrs e cu la presince vive dal bosc e de int, di dutis lis etâts.
◆ Come che al ricuarde il diretôr artistic Alberto Busettini, «Risonanze e je une ocasion par tornâ a lâ ae origjin dal sun, par sintî il dialic tra musiciscj e struments, tra liutârs e artiscj, tra nature e musiche. Il bosc, che sigûr nol è cence vôs, al cjape dentri i suns e ju torne a mandâ fûr come vibrazions de sô memorie. I grancj peçs di risonance si puedin tocjâ, imbraçâ e parfin gustâ, cul pan di scuarce che al puarte tal plat une storie antighe e profonde».
◆ Il cûr dal festival al bat tra plui lûcs dal teritori: la Val ‘Saisare, cul Forest Sound Track e i concierts tai spazis verts dal bosc, il Palaç Venezian e la place di Malborghet, che a cjaparan dentri i apontaments serâi, lis conversazions e lis esperiencis plui intimis. Tal Kinderalm di Valbrune a rivaran lis propuestis di Baby Risonanze, e invezit Cjase Oberrichter e il Palaç Venezian a fasaran di cjase a Risonanze Food, cun degustazions acompagnadis di musicolics, liutârs e artiscj. Il program si slargje ancje cun escursions, spassizadis tematichis, Risonanze Zen – dedicât al benstâ cui sunôrs de nature – e la musiche a 432 Hz.
◆ La edizion 2026 e vierç une puarte ancje viers de Europe cu la residence artistiche “Bamberga a Risonanze”, in program dai 17 ai 22 di Jugn. Une delegazion de storiche citât todescje, cun aministradôrs, docents e zovins musiciscj de scuele di musiche di Bamberghe, e sarà ospite in Valcjanâl par rinsaldâ un leam antîc. Par cirche 750 agns, dal 1007 al 1759, chest teritori al jere dentri dal Principât vescovîl di Bamberghe, che al à lassât segns impuartants te culture e te lenghe dal teritori.
◆ Tancj i concierts che a viodaran protagoniscj musiciscj furlans, insiemi a rapresentancis internazionâls. Dut al tache ai 19 di Jugn cu la ghitariste todescje Romy Resatsch: invezit sot sere si viodarà il Michelsberg Streichquartett e daspò il progjet “Numen” su lis armoniis dal jazz furlan dal pianist Angelo Comisso, insiemi al bas di Alessandro Turchet e ae batarie di Luca Colussi.
◆ Sabide ai 20 di Jugn e sarà une altre zornade di grande sugjestion. Inte buinore si podarà scoltâ Beethoven fra dai arbui de Val ‘Saisare; tal dopomisdì, un dai moments plui evocatîfs dal festival: “Un bosc e 4 stagjons”, cul nestri violinist Lucio Degani insiemi cu la Orchestre di cjamare Ferrucio Busoni direzude di Massimo Belli. Di sere, tal Palaç Venezian, la atore Astra Lanz e il pianist furlan Andrea Rucli a daran forme a flabis e contis in musiche. In place, subit dopo, e rivarà la energjie de black music acustiche cun diviersis rapresentancis furlanis intun cuartet fat de vôs di Ginga, dal piano di Rudy Fantin, dai tambûrs di Simone Gerardo dal bas di Alessandro Turchet.
◆ Domenie ai 21 di Jugn, intal dì dal solstizi di Istât, la Val ‘Saisare e ospitarà un dai apontaments plui spietâts: il “Conciert dal solstizi” cu la Gran Partita K 361 di Mozart interpretade de furlane Orchestre Audimus direzude di Francesco Gioia, e plui tart, in place, un aperitîf musicâl cu la marimbe di Katharina Görz. Tal dopomisdì, ancjemò in Val ‘Saisare, il public al podarà gjoldi un spetacul-conciert ironic e che al strissine, tra swing, cjançon di autôr, ritmis gjitans, cubans e teatri musicâl.
◆ Ma Risonanze nol è dome un festival di concierts. Cun Risonanze Outdoor si podarà lâ ator par percors tematics in cjaminadis come, une tra lis tantis, la visite al Fort Hensel, e zovâsi des propuestis sui trois de aghe in Val ‘Saisare. Cun Baby Risonanze, i fruts a saran protagoniscj di laboratoris tal ort, ativitâts cui animâi de malghe e dal bosc, esperiencis musicâls imersivis come il “Circle Concert” dal Scune Ensemble, e laboratoris di cusine come “Manine in pasta”.
◆ A completâ il mosaic a rivin Risonanze Food, cun degustazions vuidadis e moments conviviâi, e Risonanze Zen, pensât pe scolte profonde e il benstâ, cence dismenteâ l’“Officina dell’Arte” dal progjet Legno Vivo di Sacîl, promovût di “Musicae: Distretto Culturale del Pianoforte”. Chest apontament, in program ai 24 e 25 di Lui tal centri di Malborghet, al metarà in relazion artesans, struments, esposizions, incuintris, dimostrazions e performances, cun tantis maestrancis furlanis. Un grant festival, dentri de nature, e dutis lis ativitâts a son gratuitis. Par cierts apontaments la prenotazion e va fate sul sît www.risonanzefestival.com. Lait a viodi, lait a sintî, lait a vivi la Valcjanâl. ❚
