RIFLESSION – 6. Identitât e universalitât inte Bibie

6. Identitât e universalitât in Gjesù di Nazareth
Il Gjesù che o cognossìn dai vanzelis al mostre une vore di aspiets che lu “identifichin” come un mestri spirituâl dal popul di Israêl:
1) Gjesù al è un non ebraic (Jeoshua –> JHWH JASA).
2) Al è nassût intune famee ebraiche probabilmentri di dissendence davidiche e sacerdotâl.
2) Al a vût une educazion religjose ebraiche, al fevele l’aramaic ma al cognòs l’ebraic. I vanzelis nus contin che di sabide al lei la Bibie (Isaie) inte sinagoghe, e le spieghe a la int.
3) Al vîf in Galilee e in Judee, ancje se al somee che al sedi lât ator (par esempli in Egjit).
4) Al fevele dai profetis, de Leç e dal Diu di Israêl.
Dongje di chescj aspiets di identitât ebraiche, Gjesù di Nazareth al presente une serie di carateristichis “universalistichis” che lu àn puartât a scuintrâsi cui dirigjents ebraics e romans:
1) Al è contrari a dutis lis regulis de Torah che a rivuardin la puritât: “Nol è nuie che al sta fûr dal om e jentrant lu pues contaminâ; a son lis robis che a vegnin fûr dal om che a puedin contaminâlu” (Mc 7,15).
2) Al somee sostignî une vision teologjiche messianiche, indulà che un dissendent de famee dal Re David al salvarà Israêl, come che al à fat il Re dai Rês Ciro e Alexandros il “fi di Zeus”.
3) Al à une vision teologjiche une vore dongje ai libris di Enoch, che come che o ai bielzà dite a son seont me stâts influençâts de teologjie mazdee e zoroastriane.
4) Al somee cognossi il mont grêc e in particolâr il teatri grêc (viôt la peraule “ipocrite”, ‘che si compuarte come un atôr’); cualchidun al à dite che cuant che al coventave al jere bon ancje di predicjâ in grêc.
5) Al à fevelât di compassion e di amôr ancje pal nemì, concets che al samee che no esistessin in Israêl e intal mediorient antîc, ma che a jerin bielzà stâts predicjâts plui di 400 agns prime in Indie dal princip Siddharte, cognossût tant che l’iluminât. (al va indeant) ■
Franc Fari – de Universitât dal Friûl