Sfuei Mensîl Furlan Indipendent
Archivi de Patrie

RIFLESSION – 5. Identitât e universalitât inte Bibie

............

5. Aspiets universalistics inte Bibie ebraiche
Inte Bibie o cjatìn ancje tancj aspiets che jo o clami universalistics. Ven a stâi di colegament, colaborazion, scambi culturâl e religjôs cun altris popui e altris culturis.
La redazion de Bibie ebraiche e je stade fate daspò la esperience di liberazion de sclavitût in Babilonie de bande di Ciro (539 p.C.). Tant e je vere che, come che o ai dite, il Re dai Rês al è stât considerât il Messie di JHWH. Duncje une figure par simpri paradigmatiche di Re che al dilibere un popul.
La esperience di liberazion dai babilonês e je stade probabilmentri cjapade a riferiment inte redazion dal libri dal Pentateuc. La origjin di Israêl e ven colegade a une esperience di liberazion dal Egjit. Ma di cheste liberazion (tor dal 1300 p.C.) no si à nissune documentazion storiche. Il leader e fondadôr dal ebraisim, Mosé, se al è mai esistût, al samee jessi stât un princip egjizian. E forsit il prin nucli storic dal popul scjampât dal Egjit al jere un grup di egjizians monoteistics che a scjampavin vie daspò la muart dal lôr faraon Akhenaton (1360-1335 p.C.).
A nivel religjôs mi somee che a sedin stadis tantis lis influencis che il popul di Israêl al à tirât sù di altris popui e che si puedin cjatâ inte Bibie. Come che o ai dite, une de primis formis di monoteisim si à disvilupade in Egjit de bande dal faraon, considerât eretic, Akhenaton. Al è une vore dificil pensâ che il monoteisim cuasi contemporani di Mosé nol sedi colegât a chel di Akhenaton.
Dal VIII secul prime di Crist fin a la deportazion in Babilonie, JHWH al è il Diu principâl di Israêl ma al somee che nol fos di bessôl, a ‘nd jere tancj altris dius. Il monoteisim al somee rinfuarcîsi daspò il contat cul zoroastrisim. No dome, ma JHWH al cjape sù tantis carateristichis di Ahura Mazda, nol è plui teribil ma al è bon, al vûl che i oms a realizin la justizie, al pense a la vedue e al puar. Par no fevelâ dai libris apocrifs dal Vecjo Testament, come i libris di Enoch, che mi samein une vore colegâts cu la teologjie zoroastriane.
Ancje la elenizazion, che e je vignude daspò lis concuistis di Alexandros il Grant, e à puartât dentri l’ebraisim tantis ideis che o consideri universalistichis. Par esempli, a Alessandrie di Egjit e je stade scrite o voltade par grêc la Bibie (cognossude come Bibie dai setante). Une Bibie che e je stade une vore doprade dai cristians e sconfessade dal judaisim rabinic. Dôs personalitâts ebraichis une vore impuartantis dal prin secul a son Joseph Flavi e Filon di Alessandrie, doi ebreus elenizâts che a àn scrit in grêc impuartantis operis di storie e filosofie.
(al va indevant) ■
Franc Fari – de Universitât dal Friûl

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +