RICETE. Sparcs cu la mimose

Timp pe preparazion: 15 minûts par lessâ sparcs e ûfs, e 5 minûts pe salse (tignint intant i sparcs tal cjalt)
Ingredients par cuatri personis:
un mac di sparcs blancs F-VJ di un chilo,
4-5 ûfs, vueli di ulive,
asêt (blanc, ros o di pomis, daûr il propri gust),
sâl e pevar,
une sedonute di senape
SI FASIN CUSSÌ
Cualchidun al dîs che il tris perfet – “as, trê e re di briscule” – de gastronomie furlane  a saressin i sparcs blancs furlans (lessâts a vapôr o passâts su pe gridele), il persut di Sant Denêl e un grant vin blanc dal Cuei: l’imbinament di trê robis di gustâ cussì, in purece, par un plat lizêr e elegant che nol domande nuie di plui che di jessi metût in taule come che al è. Ma in Friûl si sa che la maniere juste di gustâ i sparcs blancs al è metiju tal plat cuets al vapôr, ancjemò cjalts, cun dongje sedonadis di “mimose”, chê salsute zale di fruçâ cul piron e di metile su lis pontis. La tradizionâl “mimose” e je cetant semplice. Dome ûfs dûrs taçâts grues, cun sâl, pevar (blanc, plui delicât), asêt (la cuantitât e va daûr dal gust personâl) e vueli di ulive di chel bon, messedant dut par vê une salsute no masse licuide. Segret de none? Zontâ ae salse une ponte di senape, buine di dâi chel snait che al sa esaltâ l’amâr delicât dai sparcs…
✒ Margherita Meggy Timeus