Une famee avodade al rugby che e cjale massime a tirâ dongje int par chest sport nassût
in Ingletiere, cetant preseât e educatîf
Cuant che si fevele di sport, massime sul teritori, plui che al risultât, si varès di pensâ a une ativitât che e cjale prin di dut ai zovins, ae int, ae condivision di valôrs, ae inclusion di personis cun disabilitâts o cun altris problemis. Intune peraule: il sport par tignî dongje une comunitât. Cence cjalâ al mont dai professioniscj, di dutis lis dissiplinis, al è cetant impuartant cjatâ fûr il mût di tignî dongje ducj, in maniere che l’interès e la voie di stâ insiemi a rivin a dismovi la int, gjenerant une oportunitât di stâ ben.
◆ La famee Sironi, Susanna e Riccardo e i fîs Stefano, Andrea, Federico e Davide, e fâs rime cu la part plui biele dal rugby, la ativitât sportive nassude in Ingletiere ancjemò intal Votcent. No si cjale dome al risultât di une partide: vivi une gare di bale ovâl al vûl dî vivi une esperience intal mieç di tancj apassionâts par condividi il valôr de amicizie, dal rispiet, de inclusion, de impuartance di ogni zuiadôr pes fortunis di une scuadre.
◆ Riccardo Sironi, origjinari di Rome, militâr de Aeronautiche in pension e in passât zuiadôr di rugby de serie A e alenadôr ancje inte isule di Malta, al conte: “L’Over Bug Line al fâs part di une grande clape di amîs dal rugby, presinte par dute la Italie. Si clamìn i “Old Bluff”. O sin une vore brâfs intal tierç timp. O fasìn fieste, o inmaneìn events e si cjatìn, prime des partidis de Nazionâl taliane, cuntun taulin par tirâ dongje fonts e risorsis economichis par dâ une man aes associazions de bale ovâl, no dome in Italie, ancje intal mont, soredut in Afriche. L’obietîf al è chel di judâ ducj a lâ indenant”.
_
Par fevelâ de famee Sironi, al coventarès almancul dut il gjornâl. In curt invezit, ce si puedial contâ?
“Susanna Greggio, che e je la mê femine, e je la presidente de associazion Over Bug Line. O vin cuatri fîs masclis e, cuant che o vin vierte le clape a Codroip, a son ducj jentrâts intal diretîf e ducj a àn tacât a alenâ lis scuadris dai zovins. I fîs a son ducj sportîfs. Stefano al zuie a Rovigo e al è deventât ancje campion talian. Cuant che o soi vignût a lavorâ e a vivi in Friûl, intai agns Otante, o ai tacât subit a lavorâ ancje par une ativitât sportive e o soi ancjemò achì”.
_
Cemût isal fâ ativitât a Codroip?
“Cumò o vin plui di un centenâr di frututs. O fasìn dome ativitâts pai zovins, massime in graciis dal lavôr che o fasìn tes scuelis. Agns indaûr, nol esisteve nuie di bale ovâl a Codroip: o si lave a Udin, o si lave a Pordenon. O vin cjatât un assessôr apassionât, Flavio Bertolini, e o vin tacât a Guricize. Le prime robe e je stade cjalâsi ator, fin a 30 km di distance, e cirî lis scuelis par proponiur ativitât motorie peade al rugby. La manifestazion “Tagghiamo la Scuola FVG” e ven fûr di chês ideis e cumò, chest an, o sin rivâts ae cuinte edizion, cun cetante sodisfazion”.
_
Cuâl isal il miôr sisteme par slargjâ la ativitât?
Avonde facil. Si à di fâ apassionâ i insegnants, come che o vin rivât a fâ nô intai prins agns. Dongje Codroip o vin cjatât i professôrs di Basilian, Flaiban e Rivignan che a son vignûts dongje. Cuant che, daspò di chê volte, a son lâts a insegnâ in altris lûcs, a son restâts in contat e, cussì, o sin rivâts a slargjâ la ativitât intune zone centant plui grande dal Friûl. Cumò o voi a Manzan, a Tisane, o fâs chilometris par insegnâ ativitât motorie tes scuelis. O soi in pension e mi plâs fâ chê robe achì plui che no ogni altre robe. Miôr che sierâsi intun bar a zuiâ di cjartis cun altris pensionâts”.
_
In concret, ce ativitât si fasie tes scuelis?
“O fasin chel che si clame “Tag Rugby”, che nol è il zûc classic cu la bale ovâl. O tachìn sui ombui dai zuiadôrs un pâr di strichis, che si clamin “tag”. No si puedin fâ placadis, parcè che a scuele i zovins si fasin mâl. Invezit che lâ intor dal zuiadôr cu la bale, si scuen fermâlu dome gjavant lis strichis. Nissun contat, nissun si fâs mâl: dome divertiment e cetante ativitât di corse e di coordenazion. Il zuiadôr cu la bale in man, che al è stât cjapât, al à trê pas o trê seconts par dâ vie la bale, simpri par daûr”.
__
La rispueste dai students?
“Ducj a àn voie di partecipâ. Massime i insegnants a son une vore contents, parcè che il Tag Rugby al è une ativitât indulà che ducj a segnin une mete. Pardabon ducj. Chest parcè che e je une ativitât inclusive. E une altre biele robe e je che nol è un arbitri: i zuiadôrs si clamin di bessôi lis robis no justis. Si gjestissin di bessôi, cun inteligjence. Regulis claris, nissune contestazion, dome divertiment e ativitât fisiche. Massime in chest periodi, cun problemis di spacons, bravadis e prepotents, a son une vore di zovins risiervâts, che no àn voie di confront cun chei altris. Zuiant di Tag Rugby si trasformin in positîf. E cuant che a segnin une mete, tu âs di viodi la espression di gust che a fasin”. ❚
………………………………………………………………………..
Daspò dal “Bau” dal 2000: une clape par cjalâ indenant e puartâ la passion pe bale ovâl pardut, massime ai plui zovins
Il non “Over Bug Line” al è nassût dopo superât il cetant innomenât “millennium bug”, il “bau” che al varès vût di fermâ il mont il prin dal an dal 2000.
◆ Intal 1999, une clape di amîs, zuiadôrs di rugby, e à metût adun la associazion cun chê di judâ lis personis in dificoltât, par pandi la passion pe bale ovâl ai frututs e no dome. Cun di plui, l’obietîf al jere chel di inmaneâ torneus, events e partidis di beneficence. Dal 2013 indenant, l’Over Bug Line al à cjatade une sede a Guricize di Codroip, indulà che a àn tacât i cors di educazion motorie pai frututs dai 2 ai 7 agns.
◆ Intai agns, l’OBL al à metût sù manifestazions tes splazis, torneus di rugby a 7, partidis tes presons militârs di Santa Maria Capua a Vetere. Fintremai e je stade la colaborazion cui Zûcs dal Mâr dal 1999, che e à puartât la bale ovâl dal Friûl in dut il comprensori dal Mediterani.
◆ Chest an l’OBL al à tacade une colaborazion cu “Le nestre famee” di Pasian di Prât.
◆ La presidente e je Susanna Greggio, i doi vice a son Riccardo Sironi e Stefano Sironi, il segretari al è Andrea Sironi. Dut in famee. Cui induvinial di ce che a fevelin in taule cuant che si cjatin a ore di cene? ❚
…………………………………………………………………………..
Mês di “tag rugby” tes scuelis e, ai 27 di Avrîl, la zornade conclusive a Vile Manin
Si clame “Tagghiamo la Scuola FVG”, ven a stâi “etichetâ la scuele dal Friûl-Vignesie Julie”, e al è il progjet che l’OverBug Line di Codroip al met adun ancje intal 2026. La edizion di chest an e je le cuinte e e larà indenant fin ai 27 di Avrîl, cuant che a son in calendari lis finâls tal parc di Vile Manin a Passarian di Codroip.
◆ Si fevele di une manifestazion cence nissune competizion agonistiche. La volontât dai organizadôrs e je chê di lassâ libar il confront fra i students che a partecipin al event, par che a metin a miezis la esperience za vivude a scuele intai mês di ativitât motorie, davuelte in graciis di Riccardo Sironi.
◆ Intal 2026, lis scuelis che a àn partecipât a son chês di secont grât di Tisane, Lignan, Spilimberc, Codroip e l’Istitût Malignani di Udin. Cun di plui, a saran ancje lis scuelis di prin grât di Basilian, Sedean, Manzan, Cuar di Rosacis, San Zuan dal Nadison, Lignan e Tisane e lis scuelis primariis di Flaiban, Beivârs, Faedis, Atimis, Paulêt e Udin.
◆ No si zuiarà “di bant”, parcè che te manifestazion al è ancje un concors. Ducj i students a varan di fâ un dissen par ogni classe, il teme dât al è “Il rugby e il svolâ, in dutis lis formis”. Lis oparis a saran metudis in mostre ai 27 di Avrîl e i vincidôrs a varan le pussibilitât di montâ suntun avion dal Aeroclub Furlan di Cjampfuarmit par fâ une lezion di vuide intal Istitût Nobile di Feagne. ❚
