Sfuei Mensîl Furlan Indipendent
Archivi de Patrie

Regjon sveiti! Lasse cressi lis tieris coletivis

............

Avonde vaîsi intor, avonde continuâ a fâ studis e indagjns, a domandâ consulencis. Il model lu vin in cjase. E al pues funzionâ. Lu disin i fats, i conts, no lis peraulis. Ma par fortune cualchidun si sta inacuarzint. O stin cjacarant des proprietâts coletivis, tieris, boscs e fabricâts presints in tancj comuns de Cjargne che a son di ducj, de int dal paîs, ma che il plui des voltis a son dismenteadis, lassadis lâ a remengo o cedudis ai comuns che però cumò, che no àn plui bêçs di spindi, no lis tocjin. Une volte, ai timps de Vicinie, a son coventadis pe sussistence de popolazion, po dopo, cuant che e je rivade la bondance, si sin dismenteâts di lôr, no si à rivât a inovâ.
“O sin ancjemò in timp par fâlu”, al spieghe Delio Strazzaboschi, segretari de Aministrazion dai Bens Civics di Pesariis, comun di Prât in Cjargne, la realtât che plui di altris e sta dimostrant une vitalitât incredibile, e – cjartis in man – nus spieghe cemût che e funzione. “Ae fonde di dut e à di jessi une sostignibilitât economiche, e par otignîle a son trê i pilastris dulà pontâ: i cjamps, i boscs, la zootecnie; cuntun cuart scat, il turisim, che al varès di vignî in automatic”. Il grues probleme de Cjargne al è che i terens a son un grum frazionâts: metisi adun, duncje, e je la prime robe di fâ. “A Pesariis, o taìn i boscs, o puartìn il legnam te strade e po dopo lu vendìn. Cui bêçs che o tirìn sot, paiât il personâl e ducj i coscj, ce che al reste lu metìn par aministrâ i bens frazionâi, permetint par esempli di tignî viert la buteghe di alimentârs dal paîs cence domandâ contribûts a di nissun”. Plan plan, duncje, i utii a son simpri tornâts a invistî, e in chescj agns si à rivât a comprâ gnûfs machinaris che a permetin di miorâ la ativitât di forestazion, sistemâ fabricâts di destinâ ae ricetivitât turistiche e vie discorint. Achì, però, al nas un dai problemis plui grues: la “cancrene” de burocrazie regjonâl, le clame Strazzaboschi. “I boscs a disposizion a vegnin taiâts dome par une minime percentuâl di ce che si podarès, doi mil metris cubis l’an suntune superficie di 212 mil metris cubis, mancul adiriture di chê che e je la ricressite des stessis plantis. Fûr duncje di ogni logjiche ecologjiche, e dopo si domandisi parcè che il teritori al è simpri sogjet al pericul idrogjeologjic”. Di une bande al coventarès fâ plui stradis forestâls par puartâ vie il legnam, di chê altre nol è pussibil che par intervents considerâts di logjiche di ordinarie aministrazion, pe leç a sedin intindûts di straordenarie aministrazion e duncje sogjets a dut un iter che ti fâs vignî il lat tai zenoi.
In gracie dal lavôr che il coordenament dai Bens civics regjonâl al à fat in chest agns, si à rivât a incuadrâ dut l’aspiet di cjartis e normativis. Duncje, par chei che cumò a volaressin tentâ di seguî il model, la strade e je plui o mancul splanade. Ma dut câs, al covente che la Regjon si deti une sveade, che e meti man ae leç, viodût che tra l’altri al è ancjemò in cariche un comissari straordenari pe gjestion dai ûs civics che al ven prorogât dal lontan 1920: al è passât un secul!
La fuarce dal moviment e je che, no cate ducj i bastons tai rais, si va indenant. A vuê, in Cjargne, in plui che a Pesariis, a funzionin i ûs civics ancje a Gjiviane e Tors di Rigulât, a Tualiis e Naiarêt di Comelians, a Davaste di Davâr e a Priole e Neariis di Sudri; po dopo a son ancje i Consorzis privâts di comunions familiârs tant che a Culine di For Di Avoltri, Liariis di Davâr e simpri a Tualiis e Naiarêt. Chei che invezi a àn domandât di podê tacâ a organizâsi, a son a For Disore e Disot, a Formeâs di Zui, a Paluce, e in chês altris frazions di Davâr, ducj za cul ricognossiment uficiâl des proprietâts coletivis. “Ducj insieme, o stin lavorant par une gjestion associade, par difindisi miôr de burocrazie, par vê une tutele e une sustignibilitât plui fuarte – al zonte Luca Nazzi, coordenadôr regjonâl des Proprietâts coletivis -. O volìn sburtâ fuart parcè che dut ce che o stin fasint lu fasìn cence parons, cence lâ a tucâ tes puartis cul cjapiel in man”.
Duncje, cjargnei, daitsi une sveade: o vês il business in cjase. ❚
David Zanirato

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +